මෙරට ප්රමිතිගත ප්රවෘත්ති වාර්තාකරණයේ ජනතා විශ්වාසය ඉහළින්ම දිනාගත් අංක එකේ නාමය අද දෙරණ, SLIM BRAND EXCELLENCE සම්මාන උලෙළේ "වසරේ නව්යකරණ සන්නාමයට" හිමි ලෝකඩ සම්මානය හිමි කර ගෙන තිබේ.
මෙම කාණ්ඩයේ සම්මානයක් මාධ්ය සන්නාමයකට හිමිවූයේ පළමු වරටය.
ශ්රී ලංකා අලෙවිකරන ආයතනය හෙවත් "SLIM", SLIM BRAND EXCELLENCE සම්මාන ප්රදානොත්සවය වාර්ෂිකව සංවිධාන කරන්නේ මෙරට විශිෂ්ටතම ව්යාපාර සන්නාම ඇගයීමටය.
ඒ සඳහා ජාත්යන්තරය පිළිගත් විද්යානුකූල ක්රමවේද ඔස්සේ මෙරට ව්යාපාර සන්නාම අධීක්ෂණය කෙරෙන අතර එය සිදු කෙරෙන්නේ ව්යාපාරකරණයේ දැවැන්තයින්ගෙන් සමන්විත ජූරියක් මඟිනි.
එලෙස තෝරාගැනුණු විශිෂ්ටයන් සඳහා වෙන්වූ සම්මාන රාත්රිය ඊයේ පැවැත්වුණේ ශ්රී ජයවර්ධනපුර මොනාක් ඉම්පිරියල් හෝටල් පරිශ්රයේදී ය.
මෙවර එය පැවැත්වුණේ 24 වැනි වරටයි.
මෙරට ප්රමුඛ ව්යාපාර සන්නාම 200කට අධික සංඛ්යාවක් මේ සඳහා එක්ව සිටි අතර එහිදී කාණ්ඩ කිහිපයක් යටතේ සම්මාන පිරිනැමීය.
ඒ අනුව 2025 SLIM BRAND EXCELLENCE සම්මාන උළෙලේ වසරේ හොඳම සන්නාමයට හිමි සම්මානය හිමිකරගත්තේ ELEPHANT HOUSE සමාගමය.
වසරේ හොඳම සේවා සන්නාමයට හිමි රන් සම්මානය SOFTLOGIC LIFE රක්ෂණ සමාගම සහ කොමර්ෂල් බැංකුව හිමිකරගත්තේය.
වසරේ හොඳම දේශිය සන්නාමයට හිමි රන් සම්මානය වටවල වෙළෙඳ නාමය විසින් දිනාගනු ලැබීය.
