ශ්‍රී ලංකා නවෝත්පාදන මධ්‍යස්ථානය පිහිටු වීම සම්බන්ධයෙන් සාකච්ඡාවක්

ශ්‍රී ලංකාව තුළ RMIT නවෝත්පාදන මධ්‍යස්ථානයක් (Innovation Hub) පිහිටුවීම සම්බන්ධයෙන් දැනුවත් කිරීමේ සහ පහසුකම් සැලසීමේ අරමුණෙන් ඕස්ට්‍රේලියානු Royal Melbourne Institute of Technology (RMIT) විශ්වවිද්‍යාලය සහ ජනාධිපති ලේකම් කාර්යාලයේ නියෝජිතයන් අතර විශේෂ සාකච්ඡාවක් ජනාධිපති ලේකම් කාර්යාලයේදී ඊයේ (30) පවත්වා තිබුණි.

පර්යේෂණ සහ සංවර්ධන වාණිජකරණ ජාතික ප්‍රවේශයෙහි (NIRDC) සම්බන්ධීකරණය මත මෙම සාකච්ඡාව සංවිධානය කර තිබුණි.

RMIT ශ්‍රී ලංකා නවෝත්පාදන මධ්‍යස්ථානය පිහිටු වීම මගින් දැනට පවතින ඒකාබද්ධ ආචාර්ය උපාධි වැඩසටහන් (Joint PhD) වැඩි ඵලදායීතාවකින් ක්‍රියාත්මක කිරීමට අවස්ථාවක් සැලසෙනු ඇත.

එමඟින් ශ්‍රී ලංකාව තුළ පවතින අභියෝග හඳුනා ගැනීම, ඒවාට පර්යේෂණ සහ සංවර්ධන (R&D) විසඳුම් ලබා දීම, පර්යේෂණ ප්‍රතිපත්ති සහ ජාතික අවශ්‍යතා සමඟ මෙම වැඩසටහන් සම්බන්ධ කිරීම ආදිය සඳහා අවස්ථාවක්  උදා වන අතර, මෙම ක්‍රියාවලිය අවසානයේ එයින් ලැබෙන ප්‍රතිඵල ජනතාව වෙත ගෙන යෑමද අපේක්ෂා කෙරේ. 

මෙරට ඒකාබද්ධ ආචාර්ය උපාධි වැඩසටහන් තවදුරටත් ශක්තිමත් කිරීම, දේශීය පවතින පර්යේෂණ සහ සංවර්ධන ක්‍රියාවලියට ජාත්‍යන්තර පර්යේෂණ සහ සංවර්ධන අත්දැකීම් මුසු කිරීම, RMIT සහ ශ්‍රී ලංකා විශ්වවිද්‍යාල, කාර්මික අංශය සහ රාජ්‍ය ආයතන අතර සහයෝගීතාව පුළුල් කිරීම, නව තාක්ෂණික විසඳුම් ලබා දීම, ව්‍යාපාරික අරමුණු ළඟා කර ගැනීම, නවෝත්පාදන වාණිජකරණය ඉහළ නැංවීම, දේශීය විද්‍යාඥයින්, ගවේශකයින් සහ සිසුන් ඇතුළු පර්යේෂණ සහ නවෝත්පාදන ක්ෂේත්‍ර කෙරෙහි  උනන්දුවක් දක්වන ප්‍රජාවට ජාත්‍යන්තර ප්‍රවේශය සහ පුහුණු අවස්ථා ලබා දීම, නව ආයෝජන, අරමුදල් සහ පර්යේෂණ ව්‍යාපෘති මගින් මෙරට ආර්ථික, විද්‍යාත්මක  සහ  තාක්ෂණික ක්ෂේත්‍රවල වර්ධනයට දායක වීම මෙම නවෝත්පාදන මධ්‍යස්ථානය හරහා අපේක්ෂිත ප්‍රතිලාභවන බව සඳහන් වේ.

ජනාධිපති ජ්‍යෙෂ්ඨ අතිරේක ලේකම් රසල් අපොන්සු, RMIT විශ්වවිද්‍යාලයේ නියෝජ්‍ය උප කුලපති (Research & Innovation) මහාචාර්ය කැලම් ඩ්‍රමන්ඩ් (Calum Drummond), STEM College නියෝජ්‍ය උප කුලපති (Research & Innovation) මහාචාර්ය සුජීවා සේතුංග, පර්යේෂණ සහ සංවර්ධන වාණිජකරණ ජාතික ප්‍රවේශය නියෝජනය කරමින් එහි අධ්‍යක්ෂ ජනරාල් ආචාර්ය මුදිත ඩී. සෙනරත් යාපා, අධ්‍යක්ෂ (ආයෝජන) ඉඳුනිල් ගුණතිලක යන  මහත්ම මහත්මීන් ඇතුළු පිරිසක් මෙම අවස්ථාවට එක්ව තිබේ.