මිනිස් ක්‍රියාකාරකම් හේතුවෙන් සිදුවන පරිසර හානිය අතිමහත්.
ඊට තවත් සාධකයක් ලබාදෙමින් ලෝක ඉතිහාසයේ එතෙක් මෙතෙක් සිදුකෙරුණු ගැඹුරුතම මානව කිමිදුමේදී මුහුදු පත්ලේ තැන්පත්ව තිබී කසල දැකගැනීමට හැකිවූ බවට අමෙරිකානු ගවේෂකයන් පිරිසක් අනාවරණය කර තිබේ.
ලොව ගැඹූරුම ස්ථානය ලෙසින් සැලකෙන පැසිෆික් සාගරයේ පිහිටි මරියානා ආගාධයේ මීටර් 10 928ක් ගැඹුරේ කිමිදීමට අමෙරිකානු සාගර ගවේෂකයන් පිරිසක් පසුගියදා සමත්විය.
මිනිසුන් සහිත සබ්මැරීනයක් යොදාගෙන සිදුකෙරුණු අදාළ ගවේෂණය අතරතුර එහි සාගර පත්ලේ තිබී කසල දැකගැනීමට හැකිවූ බව මේ විද්‍යාඥයන් වැඩිදුරටත් පවසයි.
මිනිසා විසින් මෙතෙක් කිසිදාක මෙතරම් ගැඹුරක් දක්වා ගමන් කර තිබුණේ නැහැ.
එය එසේ වී තිබියදී පවා අදාළ ස්ථානයේ කසල තැන්පත්ව තිබීම මගින් මිනිසා විසින් පරිසරයට සිදුකර ඇති හානියේ තරම මැනවින් පෙන්නුම් කෙරෙන බව විද්‍යාඥයින් පෙන්වා දෙයි.
වර්තමානය වනවිට ටොන් මිලියන 100කට අධික බරින් යුත් කසල සාගරය වෙත අත්හැර දමා ඇති අතර ඉන් වැඩි කොටස ප්ලාස්ටික් අපද්‍රව්‍ය බවට හදුනාගෙන තිබේ.
එය සාගරයේ වාසය කරන සත්ත්ව සම්පතට දැඩි අහිතකර තත්ත්වයක් උදාකර ඇති බවද වාර්තා වෙයි.
සාගර අපද්‍රව්‍ය බැහැරකළ හැකි ස්ථානයක් ලෙස බොහෝ දෙනා සැලකුවත් එය එසේ නොවන බවත්, අවබෝධයක් නොමැතිව මෙසේ දිගින් දිගටම සාගර දූෂණය කිරීමට ඉඩදීමෙන් අනාගතයේදී මහත් විනාශයක් සිදුවිය හැකි බවත් පරිසර වේදීන් පෙන්වා දෙයි.
මේ අතර ලෝක ප්‍රකට ඩිස්කවරි නාලිකාව වෙනුවෙන් වාර්තාමය වැඩසටහනක් නිර්මාණය කිරීමද ඒ අතරතුර සිදුවිය.
පැය 4කට ආසන්න කාලයක් තිස්සේ සාගර පත්ලේ නිරීක්ෂණ කටයුතු සිදුකෙරුණු අතර එහිදී මෙතෙක් හදුනාගෙන නොතිබුණු ජීවී විශේෂ කිහිපයක් සොයාගැනීමටත් හැකිවූ බව එම පර්යේෂණ කණ්ඩායම මෙහෙයවූ නාවික නිලධාරියා පැවසුවේය.
කූණිස්සෙකුගේ ස්වභාවය ගත් දිගු පාද ඇති ඇන්ත්‍රොපෝඩාවෙක් මෙහිදී හදුනාගෙන අතර එම සත්ත්වයා මුහුදු කැකිරියකුට සමාන පෙනුමෙන් යුතුබවද සඳහන් වෙයි.
