උණුසුම් පුවත්
උමා ඔයේ ප්‍රධාන උමඟට කාන්දු වූ ජලය සම්පූර්ණයෙන්ම පාලනය කරයි
Dec 03, 201708:14 AM
උමා ඔය ව්‍යාපෘතියේ ප්‍රධාන උමඟට කාන්දු වූ ජලය මේ වන විට සම්පූර්ණයෙන්ම පාලනය කර ඇති බව උමාඔය ව්‍යාපෘතිය භාර ඉංජිනේරුවරුන් පවසයි.
අද දෙරණ සමඟ අදහස් දක්වමින් එම ඉංජිනේරුවරුන් සඳහන් කළේ ප්‍රධාන උමඟට කාන්දු වූ ජලය නතර කිරීමේ කටයුතු ලබන වසරේ ජනවාරි මාසයේදී අවසන් කිරීමට සැලසුම්කර තිබූ බවයි.
කෙසේවෙතත් ඊයේ දිනය වන විට ප්‍රධාන උමඟට කාන්දු වූ ජලය නතර කිරීමට හැකියාව ලැබුණ බව ද ඔවුන් සඳහන් කළේය.
ඒ අනුව මේ වන විට ප්‍රධාන උමඟට කාන්දු වන්නේ තප්පරයට ලීටර් 280ක පමණ ඉතා සුළු ජල ප්‍රමාණයක් බව ඉංජිනේරුවරුන් ප්‍රකාශ කළේය.
උමගේ කැනීම් කටයුතු ආරම්භයේදී ප්‍රධාන උමඟට තප්පරයට ලීටර් 1460ක පමණ ජලය ප්‍රමාණයක් කාන්දු වූණි.
මේ හේතුවෙන් බණ්ඩාරවෙල ඇතුළු ප්‍රදේශ රැසක ජනතාවට බරපතළ ගැටළු රැසකට මුහුණපෑමට සිදු වු අතර විශේෂයෙන් ප්‍රදේශයේ ළිංවල ජලය සීදියන තත්ත්වයක් ද හට ගත්තේය.
කෙසේවෙතත් සිදු කළ කැනීම්වලදී පසුගිය මාසය වන විට ප්‍රධාන උමඟට කාන්දු වන ජල ප්‍රමාණය තප්පරයට ලීටර් 550 – 600ත් අතර ප්‍රමාණයකට අඩු කර ගැනීමට හැකියාව ලැබුණි.
