උණුසුම් පුවත්
උමා ඔය ආපසු හරවන්න බෑ
Jun 22, 201704:31 PM
උමා ඔය ව්‍යාපාරය ආරම්භ කිරීමට පෙර ලබාගෙන ඇති පරිසර වාර්තා සම්බන්ධයෙන් කිසිසේත් එකඟවිය නොහැකි බව මහවැලි සංවර්ධන හා පරිසර නියෝජ්‍ය අමාත්‍ය අනුරාධ ජයරත්න මහතා පවසයි.
මෙම ව්‍යාපෘතිය හේතුවෙන් මේ වන විට පාරිසරික ගැටළු රැසක් මතුවී ඇති බවත්, එසේ වුවත් වර්තමානයේ මෙහි කටයුතුවලින් සියයට 77ක් අවසන් කර බවත්, ඒ හේතුවෙන් ආපසු හැරීමේ හැකියාවක් නැතැයි ද ඒ මහතා කීවේය.
හැකි විගස කිලෝමීටර් 15ක් දිග උමගේ කටයුතු අවසන් කර එය සීල් කිරීමට මේ වන විට කටයුතු කරමින් සිටින බව පැවසූ ඒ මහතා කියා සිටියේ ඉන් පසු පවතින ගැටළු මගහැරී යනු ඇතැයි බලාපොරොත්තු වන බවයි.
අනුරාධ ජයරත්න මහතා මේ බව පැවසුවේ ශ්‍රී ලංකා නිදහස් පක්‍ෂ මූලස්ථානයේදී අද(22) පැවති මාධ්‍ය හමුවක් අමතමිනි.
මෙහිදී අදහස් දැක්වූ ආපදා කළමනාකරණ අමාත්‍ය අනුර ප‍්‍රියදර්ශන යාපා මහතා පැවසුවේ උමා ඔය ව්‍යාපෘතියට අදාළ සැලසුම් සකස් කිරීමේ අවස්ථාවේදී ගොඩනැගිලි පර්යේෂණ සංවිධානයේ කිසිම සහයෝගයක් ලබාගෙන නැති බවයි.
