සමන්ත කුමාර නොහොත් වෙලේසුදාට එරෙහි නඩුව තවදුරටත් පවත්වාගෙන යාම පිළිබඳව තීරණය කිරීමට කල් ලබාදෙන මෙන් නීතිපතිවරයා කොළඹ මහාධිකරණයෙන් ඉල්ලීමක් කර තිබේ.
මත්කුඩු ජාවාරම් සම්බන්ධයෙන් අධිකරණය හමුවේ පවරා ඇති නඩුව අද කැඳවූ අවස්ථාවේ නීතිපතිවරයා වෙනුවට රජයේ නීතීඥවරයා විසින් එම ඉල්ලීම ඉදිරිපත් කර ඇති බව අද දෙරණ අධිකරණ වාර්තාකරු සඳහන් කරයි.
නඩුවට අදාළ පොලිස් පරීක්ෂණ වාර්තා අස්ථානගතවී ඇති බැවින් එම නඩුව පවත්වාගෙන යාමට හැකියාවක් නොමැති බව විත්තිකරු වෙනුවෙන් පෙනී සිටි නීතීඥවරයා මීට පෙර අධිකරණය හමුවේ ප්රකාශ කර තිබේ.
ඒ අනුව විත්තිකාර වෙලේසුදා නොහොත් සමන්ත කුමාර නිදහස් කරන ලෙස නීතීඥවරයා අධිකරණයෙන් ඉල්ලා ඇත.
කෙසේවෙතත් නඩුව අද (16) කැඳවූ අවස්ථාවේ කොළඹ මහාධිකරණය හමුවේ රජයේ නීතීඥවරයා ප්රකාශ කරනු ලැබුවේ අදාළ ඉල්ලීම පිළිබඳ අධ්යයනයට කාලය අවශ්ය බවයි.
එම කරුණු සලකා බැලීමෙන් අනතුරුව ලබන 16 වනදා නඩුව යළි කැඳවීමටත් එදිනට නඩුව තවදුරටත් පවත්වාගෙන යාම පිළිබඳ නීතිපතිවරයාගේ තීරණය අධිකරණයට දැනුම්දෙන ලෙසත් කොළඹ මහාධිකරණ විනිසුරු ලලිත් ජයසූරිය මහතා නියෝග කර තිබේ.
