උණුසුම් පුවත්
ඉන්ධන නොමැතිවීමෙන් අනුරාධපුරය උණුසුම්
Jun 16, 202203:08 PM
ඉන්ධන ගැටලුව හේතුවෙන් අනුරාධපුර රෝහලේ කටයුතු මේවන විට අඩාලවී තිබේ.
රෝහලේ හදිසි ප්රතිකාර සේවා පමණක් සිදුකෙරෙන බව "අද දෙරණ" වාර්තාකරු පැවසීය.
ඒ සම්බන්ධයෙන් රජයේ වෛද්ය නිලධාරීන්ගේ සංගමයේ අනුරාධපුර දිස්ත්රික් සම්බන්ධීකාරක අජන්ත රාජකරුණා පවසා සිටියේ, අද දින රෝහලේ සේවකයින්ට රාජකාරී සඳහා පැමිණීමට ඉන්ධන නොමැතිවීමෙන් ගැටලුවක් මතුවූ බවය.
ඒ මහතා සඳහන් කළේ, ඇතැම් සේවකයින් රාජකාරී සඳහා නොපැමිණ තෙල් පෝලීම්වල රැඳී සිටින බවත් තවත් සේවකයින් පිරිසක් රාජකාරී සඳහා වාර්තාකර තෙල් පෝලීම්වලට එකතුවී ඇති බවත්ය.
මේ අතර අද උදෑසන අනුරාධපුර ප්රදේශයේ ඉන්ධන පිරවුම්හලකින් අනුරාධපුර සහකාර පොලිස් අධිකාරිවරයාගේ යැයි පැවසෙන මෝටර් රථයකට ඉන්ධන ලබාගැනීමට යාමේදී උණුසුම් තත්ත්වයක් ඇතිවිය.
ඒ එම මෝටර් රථය ඉන්ධන පෝලීමේ නොසිට ඉන්ධන ලබාගැනීමට උත්සාහ කළ අවස්ථාවේදී ය.
