ලංකා කම්කරු කෙංග්‍රසයේ නායක ආරුමුගන් තොණ්ඩමන් අමාත්‍යවරයා අභාවප්‍රාප්ත වී තිබේ.
හෘදයාබාධයක් හේතුවෙන් ඒ මහතා අද(26) රාත්‍රියේ අභාවප්‍රාප්ත වූ බව වාර්තා වෙයි.
රෝගී තත්ත්වය හේතුවෙන් තලංගම ප්‍රාදේශිය රෝහලට ඇතුළත් කරන විට ඒ මහතා මියගොස් සිටි බව රෝහල් ප්‍රකාශකයෙකු පැවසුවේය.
1964 වසරේ මැයි මස 29 වනදා උපන් ආරුමුගන් තොන්ඩමන් මහතා දීර්ඝ කාලයක් පාර්ලිමේන්තුව නියෝජනය කරමින් ක්‍රියාකාරි දේශපාලනයේ නිරතව සිටි අතර මියයන විට ඒ මහතා 55 වන වියේ පසුවුණි.
මෙරට ප්‍රකට දේශපාලනඥයෙකු වූ සත්‍යමූර්ති තොණ්ඩමන් මහතාගේ මුනුබුරෙකු වන ආරුමුගන් තොණ්ඩමන් මහතා 1994 වසරේ පැවැති මහ මැතිවරණයෙන් පළමු වරට පාර්ලිමේන්තුව සදහා තේරීපත් වුණි.
එතැන් පටන් 26ක කාලයක් වතු කම්කරු ජනතාව නියෝජනය කරමින් අඛණ්ඩව නුවරඑළිය දිස්ත්‍රික්කයෙන් පාර්ලිමේන්තුවට තේරීපත්විමට තොණ්ඩමන් මහතා සමත් වුණි.
දේශපාලනයේ දිවියේ විවිධ අමාත්‍යධුර හෙබවූ හෙතෙම මියයන විට වත්මන් ආණ්ඩුවේ ප්‍රජා සවිබල ගැන්වීම් සහ වතු යටිතල පහසුකම් සංවර්ධන කැබිනට් අමාත්‍ය ධුරය හෙබවමින් සිටියේය.
මේ අතර ආරුමුගන් තොණ්ඩමන් මහතා අභාවප්‍රාප්ත වූ තලංගම ප්‍රාදේශිය රෝහල වෙත අග්‍රාමාත්‍ය මහින්ද රාජපක්ෂ මහතා ඇතුළු අමාත්‍යවරුන් සහ හිටපු මන්ත්‍රිවරුන් පිරිසක් පැමිණ සිටියේය.
