කොවිඩි නයින්ටීන් වෛරසය ආසාදනය වී මෙරට තුළ මිය ගිය තුන්වැනි පුද්ගලයාගේ දේහය පිළිබඳ අවසන් කටයුතු විවිධ විරෝධතා මැද අද(02) සිදුකෙරුණි.

මෙය කොළඹ නගර සභා සීමාවේ සිදු වූ පළමු කොවිඩ් නයින්ටීන් මරණයයි.

අදාළ පුද්ගලයා රැඳී සිටි නිවාස සංකීර්ණය මේ වන විට සම්පූර්ණයෙන් වසා දමා ඇත්තේ පදිංචිකරුවන් 1300 ක් නිවාසවලට සීමා කරමින්.

කොවිඩ් නයින්ටීන් රෝගය ආසාදනය වීම නිසා මෙරට තුළදී මියගිය තෙවැනි පුද්ගලයාගේ දේහය පිළිබඳව අවසන් කටයුතු සිදු කිරීම සඳහා පළමුව ජාවත්තේ පිහිටි සුසාන භූමිය බලධාරීන් විසින් සූදානම් කර තිබුණි.

එහිදී ප්‍රදේශවාසීන්ගේ විරෝධය එල්ල වීම නිසා දේහය පිළිබඳ අවසන් කටයුතු එම ස්ථානයේ සිදුකිරීමට හැකි වූයේ නැහැ.

ඉන් පසුව බලධාරීන් තීරණය කළේ, මුල්ලේරියාව උඩුමුල්ල පොදු සුසාන භූමියයි.

කෙසේ වෙතත්, එය දැනගත්, ප්‍රදේශවාසීන් අදාළ ස්ථානයට එක්ව ඊට විරෝධය දැක්වූයේ ආදාහනාගාරයේ ගැටළු ඇති බවට පවසමින්.

අනතුරුව එම ස්ථානයට පැමිණි පොලිසිය රැස්වූ ජනතාව එම ස්ථානයෙන් ඉවත් කරනු ලැබීය.

ඉන් පසු දහවල් 12ට පමණ මිය ගිය පුද්ගලයාගේ මෘත දේහය ආදාහනාගාරයට රැගෙන ගියේය.

එම අවස්ථාවේදීත් පොදු සුසාන භූමිය ආසන්නයේ රැස්වූ ගම්වාසීන්ට මහජන සෞඛ්‍ය පරීක්ෂකවරුන් විසින් තත්ත්වය පැහැදිලි කළේය.

අනතුරුව දේහය පිළිබඳව අවසන් කටයුතු සිදුකෙරුණේ ජාත්‍යන්තර නිරෝධායන නීති රෙගුලාසීන්ට අනුවයි.

කොවිඩ් නයින්ටීන් වෛරසය ආසාදනය වීමෙන් මියගිය පුද්ගලයා හැත්තෑ තුන් හැවිරිදි කොළඹ මරදාන ඉමාමුල් අරූස් මාවතේ පදිංචිකරුවෙක්.

මීට දින 10ට පමණ පෙර රෝග ලක්ෂණ පෙන්නුම් කර ඇති අතර ඔහු කොළඹ ජාතික රෝහලෙන් ප්‍රතිකාර ලබා තිබේ.

පසුව අදාළ පුද්ගලයා යළි පසුගිය මස විසිවැනිදා කොළඹ නාගරික බෙහෙත් ශාලාවෙන්ද ප්‍රතිකාර ගෙන ඇත්තේ, රෝගය සුව නොවීම හේතුවෙන්.

කෙසේ වෙතත් තත්ත්වය බරපතළ වීමත් සමඟ පෙරේදා දිනයේදී ඔහු ශ්‍රී ජයවර්ධනපුර රෝහලට ඇතුළත් කර තිබේ.

එහිදී සිදු කළ පරීක්ෂණවලදී අනාවරණ වී ඇත්තේ ඔහුට කොවිඩි නයින්ටීන් වෛරසය ආසාදනය වී ඇති බවයි.

අනතුරුව ඔහුව අයි.ඩී.එච්. රෝහල වෙත මාරුකර යවන අතරතුරදී මියගොස් තිබේ.

සෞඛ්‍ය අංශ පවසන්නේ මියගිය පුද්ගලයා දියවැඩියාව, අධික රුධිර පීඩනය, දිගු කාලීන වකුගඩු අඩපණවීම ආදි රෝගී තත්ත්වයන්ගෙන් පෙලී ඇති බවයි.

කෙසේ වෙතත් මියගිය පුද්ගලයා පිළිබඳ සොයාබැලීමේදී අනාවරණ වී ඇත්තේ ඔහුගේ බෑනනුවන් පෙබරවාරී මස 28 වැනිදා මක්කම වන්දනාවේ ගොස් මෙරටට පැමිණ ඇති බවයි.

සෞඛ්‍ය අංශ එහිගොස් සිදුකළ සොයා බැලීමේදී මියගිය පුද්ගලයාගේ දියණියට, බෑනනුවන්ට සහා ඔවුන් දෙදෙනාගේ දරුවන් දෙදෙනාටද කොවිඩ් නයින්ටීන් රෝග ලක්ෂණ පෙන්නුම් කර තිබේ.

අනතුරුව ඔවුන් කොළඹ ජාතික රෝහල හරහා අයි.ඩී.එච් රෝහල වෙත මාරු කර යවා අති අතර මිය ගිය පුද්ගලයාගේ බිරිඳ නිරෝධායනය සඳහා පුත්තලමට යවනු ලැබීය.

සෞඛ්‍ය අංශ පවසන්නේ, මියගිය කොරෝනා රෝගියා පදිංචිව සිටි මරදාන ගිනි නිවන හමුදා මූලස්ථානය අසල ඉමාමුල් අරූස් මාවතේ පිහිටි මහල් නිවාස සංකීර්ණය ඊයේ රාත්‍රියේම මුද්‍රා තැබූ බවයි.

නිවාස සංකීරණයේ තුන්වැනි මහලේ පිහිටි මෙම මියගිය පුද්ගලයාගේ නිවස පිහිටා තිබේ.

මෙම නිවාස සංකීර්ණය තුළ නිවාස 218ක පුද්ගලයින් 1300ක් පමණ ජීවත් වෙයි.

එමෙන්ම මෙම නිවාස සංකීර්ණය පිහිටි ස්ථානයේ සිට වර්ග කිලෝ මීටර් 02ක පමණ දුරක කොළඹ නගරයේ පිහිටි වැදගත් මරමස්ථාන රැසක් පිහිටා තිබේ.

මිය ගිය පුද්ගලයා ඇසුරු කළ හා එම පිරිස ඇසුරු කළ පුද්ගලයින් 300 දෙනෙක් නිරෝධායනය සඳහා අද පස්වරුවේ පූනානි නිරෝධායන කඳවුර වෙත රැගෙන යනු ලැබීය.

මේ අතර මියගිය පුද්ගලයා ඇසුරු කළ මීතොටමුල්ල ප්‍රදේශයේ පදිංචිකරුවන් එකොලොස් දෙනෙකු ද අද නිරෝධායන මධ්‍යස්ථාන වෙත යොමු ක‍ළේය.