අමෙරිකාව සහ චීනය අතර පවතින වෙළඳ විරසකය සමනය කරමින් දෙපාර්ශවය නව ගිවිසුමකට එකඟත්වය පළ කර ඇත.
ජනාධිපති ඩොනල්ඩ් ට්‍රම්ප් පවසන්නේ ගිවිසුම ප්‍රකාරව චීනය අමෙරිකානු ඩොලර් බිලියන 50ක වටිනාකමකින් යුතු සිය කෘෂිකාර්මික නිෂ්පාදන මිලදී ගනු ඇති බවයි.
චීනය සහ අමෙරිකාව පළමු අදියරේ ආර්ථික වෙළඳ ගිවිසුමේ වගන්ති සම්බන්ධයෙන් එකඟතාවන්ට පැමිණ ඇත.
බුද්ධිමය දේපල අයිති, තාක්ෂණ පවරා දීම, ආහාර හා කෘෂි නිෂ්පාදිත, මුල්‍ය සේවාව, විදේශ විනිමය හා විනිවිදභාවය, වෙළඳාම පුළුල් කිරීම, ද්විපාර්ශ්වික ඇගයීම, මතභේද නිරාකරණය කිරීම යනාදී කරුණු එම වගන්තිවලට ඇතුළත්.
චීන නිෂ්පාදිතවලට පණවා ඇති අතිරේක රේගු බදු අහෝසි කිරීම පිළිබඳ ව අමෙරිකාව දුන් ප්‍රතිඥාව ඉටු කිරීමට දෙපාර්ශ්වය එකඟ ව සිටියි.
මෙම ගිවිසුම චීනය සහ ඇමරිකාව අතර ආර්ථික වෙළඳ සහයෝගතා පුළුල් කිරීමට ඉවහල් වනු ඇති බව සඳහන්.
ගිවිසුමට අදාළ නීති පරීක්ෂණ ක්‍රියාදාමය කඩිනමින් අවසන් කර ගිවිසුමට අත්සන් තැබීමේ කටයුතු සම්බන්ධයෙන් සාකච්ඡාව ආරම්භ කිරීමට දෙපාර්ශ්වය එකඟ වී තිබුණි.
මේ අතර ජනාධිපති ඩොනල්ඩ් ට්‍රම්ප් පවසන්නේ ගිවිසුම ප්‍රකාරව චීනය අමෙරිකානු ඩොලර් බිලියන 50ක වටිනාකමකින් යුතු සිය කෘෂිකාර්මික නිෂ්පාදන මිලදී ගනු ඇති බවයි.
ඔහු ධවල මන්දිරයේ දී මාධ්‍යවේදීන් අමතමින් කියා සිටියේ දෙවන අදියරේ ආර්ථික වෙළඳ ගිවිසුම සම්බන්ධයෙන් කඩිනමින් සාකච්ඡා ආරම්භ කිරීමට බලාපොරොත්තු වන බවයි.
