ගෝඨාභය රාජපක්ෂ මහතාට එරෙහිව අමෙරිකාවේ පවරා ඇතැයි පැවසෙන සිවිල් නඩු ,ඔහුගේ අමෙරිකානු පුරවැසිභාවය ඉවත් කර ගැනීමට කිසිදු බාධාවක් නොවන බව හිටපු ආරක්ෂක ලේකම්වරයාගේ අමෙරිකානු නීතීඥයින් තහවුරු කර ඇතැයි පාර්ලිමේන්තු මන්ත්රී විමල් වීරවංශ මහතා පවසයි.
අද(09) ඒකාබද්ධ විපක්ෂය කැඳවා තිබූ මාධ්ය හමුවකදී ඔහු මේ බව ප්රකාශ කළේය.
මාධ්යෙව්දී ලසන්ත වික්රමතුංග ඝාතන චෝදනාවට සහ කැනේඩියානු ජාතිකයෙක් වන රෝයි සාමදානම් නැමැත්තා 2007 සිට 2010 වසර දක්වා රඳවාගෙන වදහිංසා කල බවට චෝදනා කරමින් ජාත්යන්තර සත්ය සහ යුක්තිය ව්යාපෘතිය නැමැති රාජ්ය නොවන සංවිධානයක් විසින් හිටපු ආරක්ෂක ලේකම් ගෝඨාභය රාජපක්ෂ මහතාට එරෙහිව කැලිෆෝනියා අධිකරණයේ නඩු පවරා ඇති බව එම සංවිධානය ඊයේ(08) මාධ්ය නිවේදනයක් නිකුත් කරමින් සඳහන් කළේය.
නඩුවට අදාල නොතීසිය ඉරිදා කැලිෆෝනියාවේ “ට්රේඩර් ජෝස්“ වෙළඳසැලක රථගාලේදී නිල වශයෙන් හිටපු ආරක්ෂක ලේකම්වරයාට භාරදුන් බවද එම නිවේදනයේ සඳහන් විය.
මේ අතර අමෙරිකාවේ පෞද්ගලික විමර්ශන සහ ආරක්ෂක ආයතනයක් වන ප්රිමියර් ග්රෘප් ඉන්ටර්නැෂනල් ආයතනය සහ අයිඩියල් ඉන්වෙස්ටිගේෂන් ආයතනය එක්ව ගෝඨාභය රාජපක්ෂ මහතාට නෛතික ලියවිලි භාරදුන් බව , එම අවස්ථාවේ ලබාගත් බව කියන ඡායාරූපයක්ද සමග අද පෙරවරුවේ PGI නිල ට්විටර් ගිණුමේ පළකර තිබුණි.
“ලුහුබැඳ ගොස් භාරදුන්නා“ යන අරුත දෙන ඉංග්රීසි සිරස්තලයක් එම ඡායාරූපයේ සඳහන්ව තිබූ නමුත් අද සවස වන විට එම ඡායාරූපය එම ආයතනයේ ට්විටර් ගිණුමෙන් ඉවත් කර තිබුණි.
කෙසේවෙතත් ඊයේ දින අද දෙරණට ප්රකාශයක් ලබාදෙමින් ගෝඨාභය රාජපක්ෂ මහතාගේ ප්රකාශකයෙකු සඳහන් කළේ හිටපු ආරක්ෂක ලේකම්වරයාට කිසිදු “අධිකරණයකින්“නොතීසි භාරදී නොමැති බවයි.
එමෙන්ම හිටපු ආරක්ෂක ලේකම්වරයා මේ වනවිට රැඳී සිටින්නේ කැලිෆෝනියා ප්රාන්තයේ නොව අමෙරිකාවේ වෙනත් ප්රාන්තයක බවද ඔහුගේ ප්රකාශකයා සඳහන් කළේය.
ගෝඨාභය රාජපක්ෂ මහතා මේ මස 12 වෙනිදා යළි ශ්රී ලංකාවට පැමිණීමට නියමිත අතර හිටපු ආරක්ෂක ලේකම්වරයාට එරෙහිව අමෙරිකාවේ නඩු පවරා ඇති බවට පලවන වාර්තා සම්බන්ධයෙන් අදත් විවිධ පාර්ශ්ව අදහස් පළකළේය.
https://youtu.be/hTY9nk3t2Wk
