කිලිනොච්චිය, පරවිපරච්චාන් යුද හමුදා කඳවුර සති දෙකක කාලයක් තුළ ඉවත් කර, හමුදා කඳවුර වෙත පවරා ගෙන ඇති ජනතාවගේ ඉඩම් නැවත ඔවුන් වෙත ලබාදෙන බව විපක්ෂ නායක ආර්. සම්බන්ධන් මහතා පවසයි.
පරවිපරච්චාන් යුද හමුදා කඳවුර ඉවත් කිරීම සම්බන්ධයෙන් ආරක්ෂක ලේකම්වරයා සහ කිලිනොච්චිය දිස්ත්රික් ලේකම්වරයා සමග තමා සාකච්ඡා කළ බව විපක්ෂ නායකවරයා පෙන්වා දෙයි.
ඉදිරියේදී මේ සම්බන්ධයෙන් ජනාධිපතිවරයා සහ අග්රාමාත්යවරයා සමග ද සාකච්ඡා කිරීමට බලාපොරොත්තු වන බව ආර්. සම්බන්ධන් මහතා පවසයි.
හමුදා කඳවුර වෙත පවරා ගෙන ඇති සිය මුල් ඉඩම් නිදහස් කරන ලෙස ඉල්ලා පරවිපරච්චාන් යුද හමුදා කඳවුර ඉදිරිපිට විරෝධතාවයේ නිරත වූවන් හමුවූ අවස්ථාවේ විපක්ෂ නායක ආර්. සම්බන්ධන් මහතා මේ බව ප්රකාශ කර තිබේ.
විපක්ෂ නායකවරයාගේ ප්රකාශයෙන් අනතුරුව දින 05ක කාලයක් පැවති විරෝධතාවය අවසන් කිරීමට විරෝධතාකරුවන් පියවර ගත් බව අද දෙරණ වාර්තාකරු සඳහන් කළේය.
මේ සම්බන්ධයෙන් අද දෙරණ , ආරක්ෂක ලේකම් කරුණාසේන හෙට්ටිආරච්චි මහතාගෙන් විමසීමක් කළ අතර එහිදී ඔහු සඳහන් කළේ පරවිපරච්චාන් හමුදා කඳවුර වෙනත් ප්රදේශයක ස්ථාපිත කිරීමට තීරණය කර ඇති බවයි.
ඒ අනුව හමුදා කඳවුරට අයත්ව තිබූ භූමි ප්රදේශයෙන් අක්කර 4ක ප්රදේශයක් මේ වන විටත් එහි මුල් පදිංචිකරුවන් වෙත නිදහස් කර ඇති බව ආරක්ෂක ලේකම්වරයා පැවසුවේය.
ඉදිරි සති දෙක තුළ තවත් භූමි ප්රදේශයක් එම ජනතාවට ලබාදීමට පියවර ගන්නා බව ආරක්ෂක ලේකම් කරුණාසේන හෙට්ටිආරච්චි මහතා වැඩිදුරටත් කියා සිටියේය.
