එල් නිනෝ දේශගුණික තත්ත්වය හේතුවෙන් ඉදිරියේදී ඇති විය හැකි බලපෑම් පිළිබඳ අවධානය යොමු කරමින්, පවතින දත්ත මත පදනම් වූ පුරෝකථන සම්බන්ධයෙන් ජනාධිපති අනුර කුමාර දිසානායක මහතා නිලධාරීන්ගෙන් කරුණු විමසා තිබේ.
ව්යසන කළමනාකරණ ජාතික සභාව ජනාධිපතිවරයාගේ ප්රධානත්වයෙන් අද (30) පෙරවරුවේ ජනාධිපති ලේකම් කාර්යාලයේදී රැස් වූ අවස්ථාවේදී මේ පිළිබඳව සාකච්ඡා කෙරිණි.
එහිදී එල්නිනෝ තත්ත්වයට මුහුණ දීම සඳහා ගත යුතු ක්රියාමාර්ග, ව්යසන කළමනාකරණ පද්ධතියේ ප්රතිසංස්කරණ සහ ජාතික ආපදා ඒකාබද්ධ යාන්ත්රණය පිළිබඳව දීර්ඝ ලෙස අවධානය යොමු කර තිබේ.
කෘෂිකර්මාන්තය, පානීය ජල සැපයුම සහ බලශක්ති උත්පාදනය යන අංශවල සූදානම පිළිබඳවද මෙහිදී සාකච්ඡා වී ඇත.
මහ කන්නයේ වගා කටයුතු කල්තියා ආරම්භ කිරීම, ජල සම්පත් කළමනාකරණය සහ වනජීවි කලාපවල ජල හිඟය හේතුවෙන් වන සතුන්ට ඇති විය හැකි බලපෑම් පිළිබඳවද අවධානය යොමු කෙරිණි.
වනජීවි කලාප තුළ පවතින වැව් කඩිනමින් ප්රතිසංස්කරණය කරන ලෙස ජනාධිපතිවරයා පරිසර අමාත්යාංශයට උපදෙස් ලබා දී තිබේ.
එමෙන්ම ජල විදුලි උත්පාදනය අඛණ්ඩව පවත්වා ගැනීම සඳහා ජලාශවල ජල ධාරිතාව නිසි ලෙස කළමනාකරණය කිරීම සහ සූර්ය බලයෙන් නිපදවන විදුලිය ගබඩා කිරීම සඳහා අවශ්ය බැටරි ගෙන්වීම කඩිනම් කිරීමේ අවශ්යතාවද ජනාධිපතිවරයා පෙන්වා දී ඇත.
මේ අතර ආයතන කිහිපයක් හරහා විසිරී පවතින ආපදා කළමනාකරණ කටයුතු එක් මධ්යස්ථානයකට ගෙන ඒම සඳහා යෝජිත ජාතික ආපදා කළමනාකරණ ඒකාබද්ධ යාන්ත්රණය පිළිබඳ කමිටු වාර්තාවද ඉදිරිපත් කෙරිණි.
2005 අංක 13 දරන ආපදා කළමනාකරණ පනතේ පවතින ප්රතිචාරාත්මක ක්රමවේදය වෙනුවට ආපදා වළක්වා ගැනීමට ප්රමුඛත්වය දෙන නව නීතිමය රාමුවක අවශ්යතාවද මෙහිදී අවධාරණය කර තිබේ.
ආපදා කළමනාකරණ මධ්යස්ථානය සහ ජාතික ආපදා සහන සේවා මධ්යස්ථානය ඒකාබද්ධ කර සේවා කාර්යක්ෂම කිරීමේ යෝජනාවක්ද සාකච්ඡාවට ලක් විය.
නායයෑම් අවදානම් ප්රදේශවල ජනතාව, විශේෂයෙන් නුවරඑළිය දිස්ත්රික්කයේ පවුල් නැවත පදිංචි කිරීම සඳහා වසර හතරක කාලසීමාවක් තුළ ක්රියාත්මක කළ හැකි සැලැස්මක් සකස් කරන ලෙසද ජනාධිපතිවරයා උපදෙස් ලබා දී ඇත.
මුදාගැනීමේ මෙහෙයුම් කාර්යක්ෂම කිරීම සඳහා ත්රිවිධ හමුදාවට අවශ්ය තාක්ෂණික උපකරණ සහ හෙලිකොප්ටර් පහසුකම් වැඩිදියුණු කිරීම, ප්රාදේශීය මට්ටමේ ආපදා මෙවලම් නඩත්තුව ශක්තිමත් කිරීම සහ පැය 24 පුරා ක්රියාත්මක දිස්ත්රික් ආපදා මෙහෙයුම් මධ්යස්ථාන පිහිටුවීම පිළිබඳවද තීරණ ගෙන තිබේ.
