තායිලන්තයේ පතායා වෙරළබඩ නගරයේ දුම්රිය මාර්ගයක් අසල දමා තිබූ සංචාරක ගමන් මල්ලක් තුළ තිබී 17 හැවිරිදි තරුණියකගේ මළසිරුරක් සොයාගෙන ඇති අතර, එම ඝාතනය සම්බන්ධයෙන් ඔස්ට්‍රේලියානු ජාතිකයෙකුට මිනීමැරුම් චෝදනා එල්ල වී තිබේ.

තුන්චනොක් දොන්හොම්ලා (Tunchanok Donhomla) නැමැති මෙම තරුණියගේ නිරුවත් සිරුර ගමන් මල්ලක "ඔතා" දමා තිබියදී පසුගිය සෙනසුරාදා අලුයම පොලීසිය විසින් සොයා ගන්නා ලදී.

මෙම මරණය සම්බන්ධයෙන් සයිමන් පීටර් කාමන් නැමැති ඔස්ට්‍රේලියානු ජාතිකයා බැංකොක් නුවර සුවර්ණභූමි ගුවන් තොටුපළේදී අත්අඩංගුවට ගත් බව තායිලන්ත පොලීසිය පවසයි. ඒ, ඔහු "රටින් පලා යාමට සූදානම් වෙමින්" සිටි අවස්ථාවකදීය.

කෙසේ වෙතත්, සැකකරු තමන්ට එල්ල වී ඇති චෝදනා ප්‍රතික්ෂේප කරයි.

පතායා නගරයේ පොලීසිය සඳහන් කර ඇත්තේ මෙම 17 හැවිරිදි තරුණිය අතුරුදන් වී ඇති බවට පසුගිය සිකුරාදා සවස වාර්තා වී තිබූ බවය.

පොලීසිය විසින් ප්‍රදේශයේ CCTV දර්ශන පරීක්ෂා කර ඇති අතර, එහිදී බ්‍රහස්පතින්දා අලුයම 03:34 ට සැකකාර කාමන්, වින්දිත තරුණිය සමඟ නිවාස සංකීර්ණයකට ඇතුළු වන අයුරු දැකගත හැකි ව තිබේ.

පසුව එදිනම රාත්‍රියේ ඔහු විශාල ගමන් මල්ලක් ද රැගෙන තනිවම පිටතට පැමිණෙන අයුරුද එහි සටහන්ව ඇත. එම ගමන් මල්ල යතුරුපැදියකට පටවාගත් ඔහු දුම්රිය මාර්ගය දෙසට ධාවනය කර තිබේ.

මෙම දර්ශන ඔස්සේ පරීක්ෂණ පැවැත්වූ පොලිසිය, සෙනසුරාදා අලුයම 01:15 ට ගුවන් තොටුපළේදී සැකකරු අත්අඩංගුවට ගෙන ඇති අතර, ඉන් විනාඩි 15 කට පමණ පසු තරුණියගේ සිරුර අඩංගු ගමන් මල්ල සොයා ගැනීමට සමත්ව තිබේ.

කාමන් තමන්ට එල්ල වූ මිනීමැරුම් චෝදනා මෙන්ම සිරුරක් සැඟවීම සහ බාලවයස්කාරියක අපයෝජනය සඳහා රැගෙන යාම යන චෝදනා සියල්ල ප්‍රතික්ෂේප කර ඇති අතර, තමන් එය සිදුකළේ ආත්මාරක්ෂාව සඳහා බව පවසා ඇත.

මාධ්‍ය වාර්තාවලට අනුව, ලිංගික සේවා සැපයීම වෙනුවෙන් තරුණියට තායි බාත් 1,000 ක් ගෙවීමට එකඟ වී තිබුණද, කාමරයට පැමිණි පසු ඔහු බාත් 500 ක් පමණක් දීමට උත්සාහ කිරීම නිසා දෙදෙනා අතර බහින්බස්වීමක් සිදුව තිබේ. එසේම තමන් නිදා සිටි අවස්ථාවේදී තරුණිය කාමරයෙන් "අතුරුදන් වූ" බවද ඔහු පොලිසියට පවසා ඇත.

පොලිස් භාරයේ සිටියදී පටිගත කරන ලද වීඩියෝවක සැකකරු මියගිය තරුණියගේ පවුලේ අයට පණිවිඩයක් දෙමින් පවසා සිටියේ:

"ඔබේ දියණියට සිදුවූ දේ ගැන මට කණගාටුයි. එය මගේ පාලනයෙන් තොරව සිදුවූවක්. ඔබ වගේම මමත් ලොකු කණගාටුවකින් ඉන්නේ. කරුණාකරලා අනිත් ගැහැණු ළමයින්ටත් කියන්න... ප්‍රවේශමෙන් ඉන්න කියලා."

කෙසේ වෙතත්, පතායා පොලිස් පවසා ඇත්තේ සැකකරුගේ ශරීරය පුරා නියපොතු සීරීම් සලකුණු පවතින බවත්, ඒවා පොරබැදීමකදී සිදුවූ සලකුණු බවත්ය. නමුත් කාමන් පවසන්නේ එම සීරීම් සලකුණු මකුළුවෙකු සපාකෑමෙන් සිදුවූ ඒවා බවය.

"Cake" යන සුරතල් නාමයෙන් හැඳින්වූ මෙම තරුණිය ඇගේ පියා සහ කුඩම්මා සමඟ ජීවත් වූ එකම දරුවා බව සඳහන් වේ. ඇය මිතුරියක සමඟ නිවාඩුවක් ගත කිරීමට යන බව පවසා ජුනි 16 වෙනිදා පතායා බලා පැමිණ ඇත.