ජාතික ප්රගතිය අත්කර ගත හැක්කේ සාමූහික ප්රයත්නයන් සහ කැපවීම තුළින් බවත්, දැනුමෙන්, කුසලතාවයෙන් සහ හැකියාවෙන් පිරිපුන් සමාජයක් ගොඩනැඟීම සඳහා රටේ උසස් අධ්යාපනය දියුණු කළ යුතු බවත් අග්රාමාත්ය ආචාර්ය හරිනි අමරසූරිය මහත්මිය ප්රකාශ කළාය.
අග්රාමාත්යවරිය මේ බව සඳහන් කළේ ඊයේ (27) කොළඹ බණ්ඩාරනායක ජාත්යන්තර සම්මන්ත්රණ ශාලාවේ පැවති ශ්රී ලංකා සංස්ථාගත ඉංජිනේරුවන්ගේ ආයතනයේ (IIESL) 48 වැනි වාර්ෂික සැසිවාරයේ ප්රධාන ආරාධිතයා ලෙස සහභාගි වෙමිනි.
Chartered Engineers, Incorporated Engineers සහ Engineering Technicians ඇතුළු ලොව පුරා විහිදෙන ඉංජිනේරු වෘත්තිකයන්ගේ වෘත්තීය අයිතිවාසිකම් සහ ප්රගතිය ආරක්ෂා කිරීමේ අරමුණින් මෙම ආයතනය ස්ථාපිත කර ඇත. මෙහිදී ශ්රී ලංකා සංස්ථාගත ඉංජිනේරුවන්ගේ ආයතනයේ නව සාමාජිකයින් වෙත සාමාජිකත්ව සහතික ප්රදානය කිරීම ද අග්රාමාත්යවරයි අතින් සිදු කෙරිණි.
මෙහිදී සභාව ඇමතූ අග්රාමාත්යවරිය, ඉංජිනේරු වෘත්තිකයන් ජාතික සංවර්ධනය වෙනුවෙන් ඉටු කරන මෙහෙවර අගය කළාය. නිරන්තරයෙන් වෙනස් වන ගෝලීය ආර්ථික පරිසරය තුළ, ඇතැම් සුදුසුකම් සඳහා පවතින සීමිත පිළිගැනීම හේතුවෙන් බොහෝ දක්ෂ වෘත්තිකයන්ගේ රැකියා සහ වෘත්තීය ප්රගති අවස්ථා සීමා වී ඇති බව ඇය මෙහිදී පෙන්වා දුන්නාය.
එම අභියෝගවලට විසඳුම් ලබාදීම පුද්ගලික වෘත්තීය දියුණුවට පමණක් නොව, ශ්රී ලංකාව තුළ ඉංජිනේරු ක්ෂේත්රය ප්රවර්ධනය කිරීමට හා ජාත්යන්තර තරගකාරිත්වය වැඩි කිරීමට අත්යවශ්ය බව ද ඇය අවධාරණය කළාය.
එම ඉලක්කයන් සපුරා ගැනීමේදී අධ්යාපනය වෙනුවෙන් රජයේ ඇති කැපවීම පැහැදිලි කළ අග්රාමාත්යවරිය, උසස් අධ්යාපනය ශක්තිමත් කිරීම ජාතික ප්රමුඛතාවක් බව ප්රකාශ කළාය. සිසුන්ට දැනුම පුළුල් කර ගැනීමටත්, කුසලතා වර්ධනය කර ගැනීමටත්, රටේ අනාගත සංවර්ධනයට ඵලදායී ලෙස දායක වීමටත් අවස්ථාව සලසන අධ්යාපනික පද්ධතියක් ගොඩනැඟීමට රජය කැපවී සිටින බව ඇය වැඩිදුරටත් පැවසුවාය.
එහිදී ඇය වැඩිදුරටත් පැවසුවේ, "ජාතික ප්රගතිය කරා යන ගමන සාමූහික උත්සාහයකින් සහ පොදු කැපවීමක් හරහා කළ හැක්කක්. ඒ සඳහා රජය, අධ්යාපනික ආයතන, වෘත්තීය ආයතන, කර්මාන්ත ක්ෂේත්රය සහ අනෙකුත් පාර්ශ්වකරුවන් අතර පවතින සංවාද සහ සහයෝගීතාවයන් තවදුරටත් ශක්තිමත් කරගත යුතුයි." යනුවෙනි.
