පාපන්දු ලෝක කුසලාන තරගාවලිය තවදුරටත් උණුසුම් කරමින්, මෙරට වේලාවෙන් අද (26) අලුයම පැවැති තියුණු තරගයකින් ප්රබල ජර්මනිය ගෝල 2-1ක් ලෙස පරාජය කිරීමට ඉක්වදෝරය සමත් විය.
සිව්වරක් ලෝක ශූරයන් වූ ජර්මනිය, ඉක්වදෝරය හමුවේ පාපන්දු තරගයකදී පරාජයට පත් වූ පළමු අවස්ථාව ලෙස ද මෙය වාර්තා පොත් අතරට එක් වේ.
ක්රීඩාලෝලීන් 82,500කට අධික පිරිසකට පහසුකම් ඇති අමෙරිකාවේ සුප්රසිද්ධ 'MetLife Stadium' ක්රීඩාංගණයේදී මෙම තරගය පැවැත්විණි.
තරගයට ඉතා සාර්ථක ආරම්භයක් ලබාගත් ජර්මානු ක්රීඩකයෝ, තරගයේ දෙවන මිනිත්තුවේදීම පළමු ගෝලය වාර්තා කරමින් පෙරමුණ ගැනීමට සමත් වූහ.
කෙසේ වෙතත්, එම වාසිය වැඩි වේලාවක් රඳවා ගැනීමට ජර්මනියට නොහැකි වූ අතර, තරගයේ 9 වැනි මිනිත්තුවේදී ක්රියාත්මක වූ ඉක්වදෝරය පෙරළා ගෝලයක් වාර්තා කරමින් තරගය සම තත්ත්වයට පත් කළේය.
තරගය පුරා පන්දුවේ වැඩි පාලනයක් ජර්මනිය සතු වුවද, ඔවුන්ගේ ආරක්ෂක වළල්ල බිඳ දැමූ ඉක්වදෝරය තරගයේ 77 වැනි මිනිත්තුවේදී තීරණාත්මක දෙවැනි ගෝලය ද වාර්තා කරමින් පෙරමුණ තමන් සතු කරගත්තේය.
මෙම අනපේක්ෂිත පරාජයත් සමග, ලෝක පාපන්දු ශ්රේණිගත කිරීම්හි 10 වැනි ස්ථානයේ පසුවූ ජර්මනියට ස්ථාන තුනකින් පසුබැසීමට සිදු වුවද, ප්රසාද ලකුණු සටහනේ පෙරමුණ තවදුරටත් රැකගැනීමට ඔවුන්ට හැකි වී තිබේ.
ශ්රේණිගත කිරීම්හි 24 වැනි ස්ථානයේ පසුවන ඉක්වදෝරය ලැබූ ජයග්රහණයත් පසුවද ඔවුන්ට 'E' කාණ්ඩයේ දෙවැනි ස්ථානය හිමිකරගැනීමට නොහැකි විය.
අයිවරි කෝස්ට් රාජ්යය දෙවැනි ස්ථානය හිමිකරගෙන සිටියි.
කෙසේ වෙතත් මෙම ඓතිහාසික ජයග්රහණයත් සමග ඉක්වදෝරයට ලෝක කුසලාන තරගාවලියේ අවසන් කණ්ඩායම් 32 අතර වටයට (Round of 32) පිවිසීමේ දොරටු විවෘත වී ඇත.
මූලික වටයේ තරග රටාව අනුව සෑම කාණ්ඩයකම පළමු සහ දෙවන ස්ථාන හිමිකර ගන්නා කණ්ඩායම් 24ක් සෘජුවම අවසන් 32 දෙනාගේ වටයට සුදුසුකම් ලබන අතර, තවත් විශේෂයෙන් තෝරාගත් කණ්ඩායම් 8කටද එම වටයට පිවිසීමට අවස්ථාව සලසා දී තිබේ.
