ඇන්ටිගුවාහි ශ්රීමත් විවියන් රිචඩ්ස් ක්රීඩංගණයේදී අද (25) ආරම්භ වූ බ.ඉ. කොදෙව් කණ්ඩායමට එරෙහි පළමු ටෙස්ට් ක්රිකට් තරගයේ කාසියේ වාසිය දිනූ කොදෙව් නායක රොස්ටන් චේස්, ප්රථමයෙන් පන්දුවට පහරදීම සඳහා ශ්රී ලංකා කණ්ඩායමට ආරාධනා කළේය.
ඒ අනුව පළමුවෙන් පන්දුවට පහරදෙන ශ්රී ලංකා කණ්ඩායම, පළමු දිනයේ දිවා විවේකය සඳහා තරගය නතර කරන විට කඩුලු 3ක් දැවී ලකුණු 95ක් රැස්කරගෙන සිටියේය.
ශ්රී ලංකා ඉනිම ආරම්භ කළ පැතුම් නිස්සංක සහ නිශාන් මධුෂ්ක අතර පැවැති සබඳතාව ලකුණු 2කට සීමා වූ අතර, ඉන් අනතුරුව පිටියේ එක්වූ දිනේෂ් චන්දිමාල් සහ නිශාන් මධුෂ්ක දෙවන කඩුල්ල වෙනුවෙන් ලකුණු 40ක සබඳතාවක් ගොඩනැගූහ.
කෙසේ වෙතත්, මුළු ලකුණු සංඛ්යාව 42ක්ව තිබියදී නිශාන් මධුෂ්ක දැවී ගිය අතර, ඉන් පසුව පිටියට පිවිසි කමිඳු මෙන්ඩිස් මුහුණදුන් පළමු පන්දුවෙන්ම දැවී යාම ශ්රී ලංකා ඉනිමට දැඩි බලපෑමක් එල්ල කළේය.
නමුත් සිව්වන කඩුල්ල වෙනුවෙන් පිටියේ එක්වූ දිනේෂ් චන්දිමාල් සහ නායක ධනංජය ද සිල්වා, ශ්රී ලංකා ඉනිම ස්ථාවර කරමින් දිවා විවේකය වනවිට නොදැවී ලකුණු 53ක සබඳතාවක් පවත්වාගෙන යාමට සමත් වූහ.
ඒ වනවිට දිනේෂ් චන්දිමාල් පන්දු 55කදී ලකුණු 40ක්ද, නායක ධනංජය ද සිල්වා පන්දු 44කදී ලකුණු 25ක්ද ලබා කඩුල්ලේ රැඳී සිටියහ.
තරග දෙකකින් සමන්විත මෙම ටෙස්ට් ක්රිකට් තරගාවලිය අන්තර්ජාතික ක්රිකට් කවුන්සිල (ICC) ලෝක ටෙස්ට් ශූරතාවලියට සමගාමීව පැවැත්වේ.
