අතුරුදහන්වුවන් වෙනුවෙන් වඩා හොඳ වන්දි ලබාදීමේ ක්රමවේදයක් සකස් කිරීමට කමිටුවක් පත් කර ඇති බව අධිකරණ සහ සහ ජාතික ඒකාබද්ධතා අමාත්ය නීතිඥ හර්ෂණ නානායක්කාර මහතා පවසයි.
අමාත්යවරයා මේ බව ප්රකාශ කළේ, යාපනය දිස්ත්රික් ලේකම් කාර්යාලයේදී සිවිල් සංවිධාන නියෝජිතයින් හමු වූ අවස්ථාවේදීය.
අතුරුදන් වූ පුද්ගලයෙකු වෙනුවෙන් ලබා දෙන රුපියල් ලක්ෂ දෙකක වන්දි මුදල ප්රමාණවත් නොවන බව එහිදී හර්ෂණ නානයක්කාර මහතා කීය.
ඒ හේතුවෙන් අතුරුදන්වූවන්ගේ ඥාතීන් විශේෂ කොටසක් සේ සළකා මීට වඩා හොඳ වන්දි ලබාදීමේ ක්රමවේදයක් සකස් කිරීමට කමිටුවක් පත් කර ඇති බව ද හෙතෙම අනාවරණ කළේය.
එම කමිටුව වන්දි පැකේජයක් ලබාදීම සම්බන්ධයෙන් සාකච්ඡා කරමින් සිටින බවත් අතුරුදන් පුද්ගලයින්ගේ ඥාතීන්ගේ ජීවිතය ගොඩනැගීම එහි අරමුණ බවත් සඳහන්ය.
පැමිණිලි විමර්ශනය කිරීමේ අරමුණ වන්දියක් ලබාදීම නොවන බවත් සිදු වුයේ කුමක්ද යන්න පිළිබදව සත්ය සොයා ගත යුතු බවත් අමාත්යවරයා කීය.
අතුරුදන් වූ පුද්ගලයින් කඩිනම් යුක්තිය ඉටු කිරීමට වත්මන් රජයේ අරමුණ බව ද අමාත්යවරයා එහිදී පෙන්වා දුන්නේය.
වත්මන් රජය බලයට පත් වන විට අතුරුදන් වු තැනැත්තන්ගේ කාර්යාලය වෙත පැමිණිලි එකොළොස් දහසක් ලැබී තිබේ.
ඒවා විසඳීම වෙනුවෙන් විමර්ශන කමිටු පත් කිරීම සඳහා විශේෂ කැබිනට් පත්රිකාවක් මගින් රුපියල් මිලියන 375ක මුදලක් වෙන් කර ඇත.
පුද්ගලයින් 75 දෙනෙකුගෙන් යුත් විමර්ශන කමිටු 25ක් මේ වන විට ක්රියාත්මක බව අමාත්ය නීතිඥ හර්ෂණ නානායක්කාර මහතා සඳහන් කළේය.
මෙම සාකච්ඡාවට අතුරුදන් වු තැනැත්තන්ගේ ඥාතීන් විශාල පිරිසක් පැමිණ සිටින බැවින් වත්මන් රජයේ යාන්ත්රණය පිළිබඳව පවතින විශ්වාසය පැහැදිලි බව ඔහු පැවසීය.
2009 වසරේදී යුද්ධය අවසන් වූවත් අතුරුදන් වූ තැනැත්තන්ගේ ගැටලු තවමත් පැවතීමෙන් හෙළි වන්නේ, පසුගිය රජයන් ඒවා නිසි අයුරින් විසඳා නොමැති බවය.
අතුරුදන් වු ඥාතියා සම්බන්ධයෙන් විවිධ කොමිෂන් සභාවට ආයතනවලට කිහිපවරක් පැමිණිලි ලැබී තිබේ.
ඥාතීන් අතුරුදන් වු අතීතය අමතක කරන ලෙසට තමන් නොපවසන බවත්, අලුතින් සිතමින් විශ්වාසය ගොඩ නගමින් ඉදිරියට යා යුතු බවත් අමාත්යවරයා පැවසීය.
උතුරේ සහ දකුණේ සියලු ජනතාවගේ සිත් දිනාගනිමින් වත්මන් රජය බලයට පත්ව ඇති අතර මේ ප්රශ්නවලට ස්ථිර අවසානයක් ලබා දිය යුතු බව ද අධිකරණ සහ සහ ජාතික ඒකාබද්ධතා අමාත්ය නීතිඥ හර්ෂණ නානායක්කාර මහතා වැඩිදුරටත් සඳහන් කළේය.
