ලෝක බැංකු සමූහයේ දේශීය කළමනාකරු ගෙවෝගර් සාගර්සයාන් මහතා ප්රමුඛ නියෝජිත කණ්ඩායමක් අද පෙරවරුවේ අමාත්යවරයා හමුවී ඇති අතර, අමාත්යාංශයේ ජ්යෙෂ්ඨ නිලධාරීන්ද ඊට එක්ව සිටියහ.
මෙහිදී ප්රධාන වශයෙන් කොළඹ වරායේ සංවර්ධනය සඳහා නව මූල්ය ආකෘති, පෞද්ගලික අංශයේ සහභාගීත්වය සහ යටිතල පහසුකම් වැඩිදියුණු කිරීම පිළිබඳව සාකච්ඡා කර තිබේ.
කොළඹ වරායේ සංවර්ධනය සම්බන්ධයෙන් රජයේ ඉදිරි සැලසුම් පිළිබඳව ලෝක බැංකු නියෝජිතයින් විමසා ඇති අතර, වරාය යටිතල පහසුකම් සංවර්ධනය පිළිබඳව ලෝක බැංකුව සහ ආසියානු සංවර්ධන බැංකුව එක්ව අධ්යයනයක් සිදුකරමින් පවතින බවද දැනුම් දී ඇත.
නැගෙනහිර බහාලුම් පර්යන්තය වෙනම ආයතනයක් ලෙස සංවර්ධනය කිරීම පිළිබඳවද අවධානය යොමුව ඇති අතර, ඒ සඳහා අවශ්ය නීතිමය උපදෙස් ලබාගැනීමට කටයුතු කරමින් සිටින බව අමාත්යවරයා සඳහන් කළේය.
එමෙන්ම වරාය සංවර්ධන ක්රියාවලියේදී සේවක අයිතිවාසිකම් සහ වෘත්තීය සමිති සමඟ එකඟතාවයෙන් කටයුතු කිරීමේ අවශ්යතාවද සාකච්ඡාවේදී අවධාරණය කර තිබේ.
මැදපෙරදිග යුද්ධය නිසා ගෝලිය අවධානය කොළඹ වරාය වෙත යොමු වී ඇති බවත්, ඒ ගැන ඉතා සැළකිළිමත් වී කටයුතු කරන ලෙස ලෝකබැංකු නියෝජිත පිරිස ඉල්ලා සිටි බව වරාය සහ සිවිල් ගුවන්සේවා අමාත්යාංශය පවසයි.
මෙහිදී ඔවුන් බංගලාදේශයේ වරාය සංවර්ධන අත්දැකීම් ගැන උදාහරණ ගෙන එමින් චිතගොං වරාය අධිකාරිය ලැබූ සාර්ථකත්වය ද අමාත්යවරයා ඇතුළු නිලධාරීන්ට පැහැදිළි කළහ.
එම සාර්ථකත්වයට චිතගොං වරාය අධිකාරිය, සිංගප්පූරු, ඩුබායි, ජෙඩා වැනි වරාය ජාත්යන්තර මට්ටමේ ක්රියාකරුවන්ගේ සහභාගීත්වය ද ලබා ගත් ආකාරය සුවිශේෂී බව සඳහන් කළහ.
මේ අතර ශ්රීලන්කන් ගුවන්සේවය සහ මෙරට ගුවන්සේවා ක්ෂේත්රයේ ඉදිරි ප්රතිව්යුහගත කිරීම් පිළිබඳවද සාකච්ඡා වී ඇත. මෙම කරුණු සම්බන්ධව ජාත්යන්තර මූල්ය සහයෝගිතාව (IFC) සමඟ ද සාකච්ඡා කරමින් සිටින බව සඳහන් විය.
මැදපෙරදිග පවතින අර්බුද හේතුවෙන් ඉන්ධන මිල ඉහළ යාම ගුවන්සේවා කර්මාන්තයට බලපා ඇති ආකාරය පිළිබඳවද අමාත්යවරයා කරුණු පැහැදිලි කළේය.
රජය ඉදිරියේදී වරාය හා ගුවන්සේවා ක්ෂේත්ර සඳහා වැදගත් ප්රතිපත්තිමය හා ආයතනික තීරණ කිහිපයක් ගැනීමට සූදානම් බවත්, එම තීරණ නිවැරදි මූල්ය ආකෘති, රාජ්ය-පෞද්ගලික සහයෝගීතාව සහ විනිවිදභාවය මත සිදුකරන බවත් අමාත්යවරයා වැඩිදුරටත් සඳහන් කළේය.
