G7 හෙවත් ලොව බලවත්ම රටවල් හතේ නායකයින්ගේ සමුළුව අතරතුර, අමෙරිකානු ජනාධිපති ඩොනල්ඩ් ට්‍රම්ප් ලෝක නායකයින් ඉදිරියේ "I’m the boss" යනුවෙන් පවසමින් යුක්‍රේනය වෙත සිය සහයෝගය පළකර තිබේ.

ජුනි 15-17 දක්වා ප්‍රංශයේ පැවැත්වෙන මෙම සමුළුවේදී, යුද පිටියේදී යුක්‍රේනය ලබා ඇති ප්‍රගතිය අගය කරමින් රුසියාවට එරෙහිව නව සම්බාධක පැනවීමට සහ යුක්‍රේනයට එක්සත් සහයෝගයක් ලබා දීමට G7 නායකයෝ එකඟතාවකට පැමිණ තිබේ.

යුක්‍රේන ජනාධිපති වොලොදිමීර් සෙලෙන්ස්කි සහ ඔහුගේ මිත්‍ර රටවල් මෙම සමුළුවට පැමිණියේ යුක්‍රේනයේ ප්‍රතිප්‍රහාර සාර්ථක වෙමින් පවතින බවත්, සාම සාකච්ඡාවලදී කොන්දේසි පැනවීමට රුසියාවට කිසිදු හැකියාවක් නොමැති බවත් ට්‍රම්ප්ට ඒත්තු ගැන්වීමේ අරමුණිනි.

වසර ගණනාවක් පුරා යුක්‍රේනය කෙරෙහි සැක සහිත ආකල්පයකින් පසුවූ ඩොනල්ඩ් ට්‍රම්ප්, මේ වන විට සෙලෙන්ස්කිගේ තර්කයන්ට එකඟ වෙමින් රුසියාව සම්බන්ධයෙන් වඩාත් දැඩි ස්ථාවරයක් වෙත පැමිණ ඇති බව සමුළුවේ නායකයින්ගේ අදහස්වලින් පැහැදිලි වන බව විදෙස් පුවත් වාර්තා කරයි.

කැනඩා අග්‍රාමාත්‍ය මාර්ක් කාර්නි මේ පිළිබඳව අදහස් දක්වමින් කියා සිටියේ, "අමෙරිකාවේ සහ ජනාධිපති ට්‍රම්ප්ගේ ස්ථාවරයේ පැහැදිලි වෙනසක් තිබෙනවා. රුසියාවට එරෙහිව වඩාත් දැඩි මෙන්ම යුද පිටියේ පවතින සැබෑ තත්ත්වය තේරුම් ගත් යථාර්ථවාදී ස්ථාවරයක් ඔවුන් දැන් ගෙන තිබෙනවා" යනුවෙනි.

සමුළුව ආරම්භ වීමට ආසන්න දිනකදී අමෙරිකාව සහ ඉරානය අතර අත්සන් තැබුණු මූලික සාම ගිවිසුම ද මෙහිදී G7 නායකයින්ගේ ඇගයීමට ලක්විය.

ඉරාන යුද සමයේදී අවහිර කර තිබූ 'හෝමුස් සමුද්‍ර සන්ධිය' මත යැපීම අවම කිරීම සඳහා බලශක්ති සැපයුම් මාර්ග විවිධාංගීකරණය කිරීමට නායකයෝ එකඟ වී තිබේ.

එමෙන්ම ලෝක ආර්ථිකයට බලපා ඇති චීන වෙළෙඳ ආධිපත්‍යය සහ ඛනිජ සම්පත් සීමා කිරීම් පිළිබඳවද සමුළුවේදී දීර්ඝ ලෙස සාකච්ඡා කර ඇත.

පසුගිය වසරේදී චීනය විසින් දුර්ලභ පස් අපනයනය සීමා කිරීම නිසා බටහිර රටවල කර්මාන්ත රැසක් අඩාල වී ඇති බව සඳහන් වේ.

මේ හේතුවෙන් චීනය මත පවතින අධි-යැපීම අවම කරගනිමින් බටහිර ආර්ථික ස්වෛරීභාවය සුරැකීම සඳහා ඒකාබද්ධ ප්‍රකාශනයකට අත්සන් තැබීමට ප්‍රංශය අනෙක් රටවලට බලපෑම් කරමින් සිටින බව සඳහන් වේ.

යුරෝපය තුළ චීන නිෂ්පාදන බහුල වීම සහ ඉන් ඇති වන වෙළෙඳ අසමතුලිතතාව පිළිබඳව ප්‍රංශ ජනාධිපති එමානුවෙල් මැක්‍රෝන් පවසා ඇත්තේ "චීනය ඕනෑවට වඩා නිෂ්පාදනය කරනවා, අමෙරිකාව ඕනෑවට වඩා පරිභෝජනය කරනවා, නමුත් යුරෝපීයයන් ප්‍රමාණවත් තරම් ආයෝජනය කරන්නේ නැහැ." යනුවෙනි.

සමුළුවේ තවත් සුවිශේෂී මාතෘකාවක් වී ඇත්තේ කෘත්‍රිම බුද්ධියේ වගකීම් සහ ඉන් සමාජය තුළ සත්‍ය සහ අසත්‍ය තොරතුරු ප්‍රචාරය වන ආකාරය පිළිබඳවය.