ඊයේ රාත්‍රියේ කොළඹ ජාතික රෝහලට ඇතුළත් කෙරුණු , රැඳවුම් නියෝග මත CID භාරයේ සිටින රාජ්‍ය බුද්ධි සේවයේ හිටපු ප්‍රධානී සුරේෂ් සලේ මහතා තවමත් එහි ප්‍රතිකාර ලබමින් සිටින බව රෝහල් ආරංචි මාර්ග පවසයි.

ඔහුව රෝහල්ගත කෙරුණේ CID නිලධාරීන් තමන්ට අමානුෂික ලෙස වදහිංසා සිදුකරන බව පවසමින් උපවාසයක නිරතව සිටින අතරතුරය.

පාස්කු ප්‍රහාරය සම්බන්ධ චෝදනා එල්ල කරමින් ඉකුත් පෙබරවාරි 25 වැනිදා අපරාධ පරීක්ෂණ දෙපාර්තමේන්තුව විසින් රාජ්‍ය බුද්ධි සේවයේ හිටපු ප්‍රධානී සුරේෂ් සලේ මහතා අත්අඩංගුවට ගනු ලැබීය.

අනතුරුව ඔහු රැඳවුම් නියෝග මත සිටියේ CID භාරයේයි.

එහිදී සුරේෂ් සලේ මහතාට CID නිලධාරීන් අමානුෂික හා කෘෘර අයුරින් සලකා ඇති බවත්, ඒ අනුව ඔහු ආහාර හා ජලය ප්‍රතික්ෂේප කරමින් උපවාසයක් අරඹා ඇති බවත් හිටපු පාර්ලිමේන්තු මන්ත්‍රී උදය ගම්මන්පිල මහතා ඉකුත් සෙනසුරාදා අනාවරණ කළේය.

අනතුරුව ඊයේ සලේ මහතාගේ සුවදුක් බැලීමට ගිය ඔහුගේ බිරිඳ , පුත්‍රයා හා සොයුරාද සලේ මහතා උපවාසයක නිරතව සිටින බව තහවුරු කළේය.

ඒ අනුව සුරේෂ් සලේ මහතා රැඳවුම් නියෝග මත රඳවාගෙන සිටීමට විරෝධය පළ කරමින් අද අඛණ්ඩ සත්‍යග්‍රහයක් ආරම්භ කරන බව විපක්ෂයේ පක්ෂ කිහිපයක් ඊයේ පස්වරුවේ පැවසීය.

එවන් පසුබිමක ආහාර හා ජලය ප්‍රතික්ෂේප කරමින් සිටින සුරේෂ් සලේ මහතාව ඊයේ රාත්‍රි 8.30 ට පමණ කොළඹ ජාතික රෝහලට ඇතුළත් කිරීමට CID නිලධාරීන් පියවර ගෙන තිබුණි.

ජාතික රෝහල් ආරංචි මාර්ග සඳහන් කළේ ඇතිවූ හදිසි අසනීප තත්ත්වයක් මත ඔහු මෙලෙස රෝහල්ගත කළ බවය.

සලේ මහතාගේ බිරිඳ ද එම අවස්ථාවේ ඔහුගේ සුවදුක් බැලීමට ජාතික රෝහල වෙත පැමිණ තිබුණි.

ඒ අතර සුරේෂ් සලේ මහතාගේ බිරිඳ වන මනෝරි සලේ මහත්මිය විසින් අපරාධ පරීක්ෂණ දෙපාර්තමේන්තුවේ අධ්‍යක්ෂ ශානි අබේසේකර මහතා වෙත ලිපියක් යොමු කර තිබේ.

මේ වන විට ජාතික රෝහලට ඇතුළත් කර තිබෙන සිය සැමියා හමුවීමට ගියත් අවසර ලබාදුන්නේ දුර සිට බැලීමට පමණක් බැවින් සිය සැමියා වෙනුවෙන් නීතිමය කටයුතු සිදුකරන නීතිඥවරුන්ට ඔහු හමුවීමට අවසර ලබාදෙන ලෙස ඇය සිය ලිපිය මගින් ඉල්ලා තිබේ.

එමගින් සිය සැමියා මාරාන්තික උපවාසය අත්හැරීම සඳහා පෙළඹවීමට හැකි වනු ඇතැයිද ඇය සිය ලිපියෙන් දක්වා තිබුණි.

මෙම තීරණාත්මක මොහොතේදී සිය සැමියාට වෛද්‍ය ප්‍රතිකාර පමණක් නොව නීතිමය සහ මානසික සහායද අත්‍යවශ්‍ය වන බව සලේ මහතාගේ බිරිඳ යොමු කළ ලිපියේ සඳහන්ය.

මේ අතර රාජ්‍ය බුද්ධි සේවයේ හිටපු ප්‍රධානී සුරේෂ් සලේ මහතාට අමානුෂික සහ කෘෘර අයුරින් සැලකීමට මෙන්ම රැඳවුම් නියෝග මත ඔහුව රඳවාගෙන සිටීමට විරෝධය පළකරමින් කොටුව දුම්රියපොළ ඉදිරිපිටදී අද පෙරවරුවේ අඛණ්ඩ සත්‍යග්‍රහයක් ආරම්භ කෙරුණි.

ඒ , මහා සංඝරත්නයේ වැඩමවීමෙන් සහ විපක්ෂයේ දේශපාලන පක්ෂ රැසක නියෝජිතයින්ගේ සහභාගීත්වයෙන්ය.

රාජ්‍ය බුද්ධි සේවයේ හිටපු ප්‍රධානී සුරේෂ් සලේ මහතාට අමානුෂික සහ කෘෘර අයුරින් සැලකීමට මෙන්ම
රැඳවුම් නියෝග මත ඔහුව රඳවාගෙන සිටීමට විරෝධය පළකරමින් අඛණ්ඩ සත්‍යග්‍රහය අද පෙරවරු 10 ට සංවිධාන කෙරු‍ණේ කොටුව දුම්රියපොළ ඉදිරිපිටදීය.

සර්වජන බලය, ජාතික නිදහස් පෙරමුණ, පිවිතුරු හෙළ උරුමය, ශ්‍රී ලංකා පොදුජන පෙරමුණ ඇතුළු තවත් විපක්ෂයේ දේශපාලන පක්ෂ කිහිපයක නියෝජිතයින් මේ සඳහා එක්ව සිටී.

සත්‍යග්‍රහයේ නිරතවන්නන්ට අසුන්ගැනීම සඳහා එම ස්ථානයට ආසන කිහිපයක් රැගෙන ඒමට උත්සාහ දැරීමේදී පොලිසිය ඊට බාධා කිරීමත් සමඟ එහි නොසන්සුන් තත්ත්වයක් හටගත්තේය.

රෝහල්ගතකළ සලේ මහතා අපරාධ පරීක්ෂණ දෙපාර්තමේන්තු නිලධාරීන්ගේ සහ පොලිස් විශේෂ කාර්ය බලකා නිලධාරීන්ගේ ආරක්ෂාව යටතේ මේ වන විටත් ප්‍රතිකාර ලබයි.