ඔන්ලයින් සූදු, විදුලි සංදේශ වංචා සහ ඒවා ආශ්රිත අපරාධ සිද්ධීන්වලට සම්බන්ධ කණ්ඩායම් වෙනත් රටවල සිට ශ්රී ලංකාව වෙත සංක්රමණය වීමේ වැළැක්වීම සඳහා චීනය සහ ශ්රී ලංකාව අතර ඒකාබද්ධ නීතිය ක්රියාත්මක කිරීමේ මෙහෙයුම් තවදුරටත් ශක්තිමත් කර තිබේ.
නිවේදනය නිකුත් කරමින් කොළඹ පිහිටි චීන තානාපති කාර්යාලය ඒ බව සඳහන් කළේය.
ශ්රී ලංකාවේ විදේශ කටයුතු, මුදල් සහ මහජන ආරක්ෂක අමාත්යාංශ ඇතුළු අදාළ ආයතන සමඟ සම්බන්ධීකරණය වැඩිදියුණු කර ඇති අතර දෙරටේ නීතිය ක්රියාත්මක කිරීමේ ආයතන අතර ප්රායෝගික සහයෝගිතාව ද වර්ධනය වී ඇති බව කොළඹ පිහිටි චීන තානාපති කාර්යාලය පවසයි.
ශ්රී ලංකා බලධාරීන් විසින් සිදුකළ වැටලීම් සහ විමර්ශනවලදී නීතිවිරෝධී සූදු හා වංචා මධ්යස්ථාන රැසක් වටලා සැකකරුවන් විශාල පිරිසක් අත්අඩංගුවට ගෙන ඇති බවද එහි සඳහන් වේ.
එම සැකකරුවන් අතර විවිධ රටවල ජාතිකයන් සිටින අතර, වංචා ක්රියාකාරකම්වලට සම්බන්ධ චීන ජාතිකයන් කිහිපදෙනෙකු චීන බලධාරීන් වෙත භාර දී ඇති බවද තානාපති කාර්යාලය පවසයි.
දේශසීමා ඉක්මවා සිදු කෙරෙන සූදු කටයුතු සම්බන්ධයෙන් චීන රජයේ ස්ථාවරය දැඩි බවත්, චීන පුරවැසියන්ට විදේශීය කැසිනෝ මෙහෙයවීම හෝ ඒවාට සම්බන්ධ වීම තහනම් බවත් නිවේදනයේ දැක්වේ.
එමෙන්ම එවැනි ක්රියාකාරකම් මුදල් විශුද්ධිකරණය, පැහැර ගැනීම්, මිනිස් ජාවාරම් සහ නීතිවිරෝධී දේශසීමා තරණය ඇතුළු බරපතළ අපරාධවලට මග පාදන බවද අවධාරණය කර ඇත.
එසේම, සංවිධානාත්මක අපරාධ කණ්ඩායම් නැගෙනහිර හා අග්නිදිග ආසියාවේ සිට වඩාත් අවදානම් සහිත ප්රදේශ වෙත ව්යාප්ත වෙමින් පවතින බවත්, වංචා මධ්යස්ථාන, භූගත බැංකු ජාල සහ නීතිවිරෝධී ඔන්ලයින් වෙළෙඳපොළවල් අතර සම්බන්ධතා වර්ධනය වෙමින් ඇති බවත් චීන තානාපති කාර්යාලය පෙන්වා දෙයි.
ශ්රී ලංකාව තුළ නීතිවිරෝධී සූදු, ඔන්ලයින් සූදු සහ විදුලි සංදේශ වංචා මැඩලීමට කඩිනම් හා දැඩි පියවර නොගතහොත් එය රටේ ජාත්යන්තර ප්රතිරූපයට, මහජන ආරක්ෂාවට සහ සමාජ ස්ථාවරත්වයට බරපතළ බලපෑම් එල්ල කළ හැකි බවද එම නිවේදනයේ සඳහන් වේ.
චීනය සහ ශ්රී ලංකාව එක්ව මෙම අපරාධ ජාල මර්දනය කිරීම, සැකකරුවන් නීතිය හමුවට පමුණුවීම සහ ඔවුන්ගේ මූල්ය හා සංවිධාන ව්යුහ බිඳ දැමීම තුළින් දෙරටේ ජනතාවගේ ජීවිත, දේපළ සහ නීත්යානුකූල අයිතිවාසිකම් ආරක්ෂා කිරීමට හැකි වනු ඇති බවද චීන තානාපති කාර්යාලය වැඩිදුරටත් අවධාරණය කරයි.
