දිවයින පුරා ක්‍රියාත්මක දැඩි පොලිස් වැටලීම් සහ විදේශීය රටවලින් නීතිවිරෝධී ලෙස ගිනිඅවි මෙරටට ගෙන්වීමට පවතින දැඩි දුෂ්කරතා හේතුවෙන්, මෙරට ක්‍රියාත්මක සංවිධානාත්මක අපරාධ කල්ලි තමන්ට අවශ්‍ය ආයුධ මෙරට තුළම නිෂ්පාදනය කිරීමට පෙළඹී ඇති බවට පොලිසිය සැක පළ කරයි.

මෙම නවතම අපරාධ උපක්‍රමය පිළිබඳව ආන්දෝලනාත්මක තොරතුරු රැසක් අනාවරණය වී ඇත්තේ බස්නාහිර උතුර අපරාධ කොට්ඨාසය විසින් අද (03) දෙමටගොඩ ප්‍රදේශයේ සිදුකළ සාර්ථක වැටලීමකිනි.

බස්නාහිර උතුර අපරාධ කොට්ඨාසය මගින් පසුගියදා අයිස් මත්ද්‍රව්‍ය කිලෝග්‍රෑම් 45ක් සමග පුද්ගලයෙකු දෙමටගොඩ ප්‍රදේශයේදී අත්අඩංගුවට ගනු ලැබීය.

ඔහුගෙන් සිදුකළ ප්‍රශ්න කිරීම්වලදී අනාවරණ වී තිබුණේ එම මත්ද්‍රව්‍ය තොගය මරණීය දණ්ඩනය නියමව සිටින අපරාධකරුවකු වන දෙමටගොඩ චමින්දගේ පුත්‍රයා වන, ඩුබායි රාජ්‍යයේ සැඟව සිටින 'මලීෂ' නමැත්තා විසින් මෙරටට එවා ඇති බවය.

රඳවාගෙන සිදුකළ ප්‍රශ්න කිරීම්වලදී සැකකරු හෙළිකළ තොරතුරු මත, මලීෂ නමැත්තාගේ මත්ද්‍රව්‍ය ප්‍රවාහනය කරන පුද්ගලයාද ගාල්ල, නෙළුව ප්‍රදේශයේදී අද අළුයම අත්අඩංගුවට ගනු ලැබීය.

ඔහුගෙන් සිදුකළ ප්‍රශ්න කිරීම්වලින් පසුව බස්නාහිර උතුර අපරාධ කොට්ඨාසයේ විමර්ශන අංශ අංක 3හි ස්ථානාධිපති, ප්‍රධාන පොලිස් පරීක්ෂක සුනිත් ජයසේකර මහතාගේ ප්‍රධානත්වයෙන් යුත් කණ්ඩායමක් මෙම දෙමටගොඩ ප්‍රදේශයේ නිවසක් පරීක්ෂා කළේය.

එහිදී එම නිවසේ බෆල් එකක් තුළ සඟවා තිබූ ටී කටස් ගිනිඅවි 19ක්, ඒ සඳහා යොදන ටී 56 උණ්ඩ 24ක් මෙන්ම නිවසෙහි තිබී තවත් මත්පෙති තොගයක්ද සොයාගැනුණි.

කෙසේ නමුත් අදාළ ගිනිඅවි සඟවා තිබූ නිවසේ හිමිකරු පළාගොස් ඇති බවය පොලිසිය පැවසීය.

දෙමටගොඩ චමින්දගේ පුත්‍ මලීෂ නමැත්තාගේ සමීපතමයෙකු වන නිවෙස් හිමිකරු, මලීෂට අයත් මත්ද්‍රව්‍ය සැඟවීම සිදුකරන බව විමර්ශනවලදී මේ වනවිට අනාවරණ වී ඇත.

එමෙන්ම ගිනිඅවි සම්පූර්ණයෙන්ම මලීෂගේ මෙහෙයවීමෙන් මෙරටදී නිපදවා ඇති බවටත්, මේ වනවිට දිගින් දිගටම අපරාධකරුවන් සතු ගිනිඅවි අත්අඩංගුවට ගැනීම හේතුවෙන් ඔවුන් දේශීයව ගිනිඅවි නිපදවීම ආරම්භකර ඇති බවටත් පොලිසිය සැක පළකරයි.

කෙසේවෙතත් අදාළ ගිනිඅවි තොගය කුමන ස්ථානයක, කෙලෙස නිෂ්පාදනය කළේද යන්න පිළිබඳව මෙතෙක් තොරතුරු අනාවරණ වී නොමැත.

සිද්ධිය සම්බන්ධයෙන් බස්නාහිර උතුර අපරාධ කොට්ඨාසය විසින් පුළුල් විමර්ශනයක් ආරම්භ කර තිබේ.