මෙරට සෞඛ්ය සේවාවේ භෞතික සම්පත් ඉහළ නංවමින් ජනතාවට ලබාදෙන ප්රතිකාර සේවාවන් වඩාත් විධිමත් සහ කාර්යක්ෂම කිරීමේ අරමුණින් අතිනවීන මැමෝග්රැෆි යන්ත්ර (Mammography Machines) 5 ක් දිවයිනේ ප්රධාන රෝහල් පහක් වෙත ලබාදීමට සෞඛ්ය හා ජනමාධ්ය අමාත්යාංශය පියවර ගෙන ඇත.
සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ උපදෙස් හා මඟ පෙන්වීම යටතේ ක්රියාවට නැංවෙන සුවිශේෂී සැලසුමක ප්රතිඵලයක් ලෙස මෙම යන්ත්ර ලබාදීමට කටයුතු සූදානම් කර තිබේ.
කාන්තාවන් අතර බහුලවම දක්නට ලැබෙන පියයුරු පිළිකා සහ පියයුරුවල ඇති වන වෙනත් අසාමාන්ය ගැටිති හෝ වෙනස්කම් ඉතා මුල් අවධියේ දී ම හඳුනා ගැනීමට සහ පසු ප්රතිකාර සේවා සඳහා මෙම යන්ත්ර භාවිත කෙරේ.
මෙම ව්යාපෘතිය සඳහා වැය කෙරෙන සමස්ත මුදල රුපියල් මිලියන 765 කි.
එහිදී එක් මැමෝග්රැෆි යන්ත්රයක වටිනාකම රුපියල් මිලියන 153 ක් වන අතර, සෞඛ්ය පද්ධති වැඩිදියුණු කිරීමේ ව්යාපෘතිය (HSEP) සහ ආසියානු සංවර්ධන බැංකුව (ADB) විසින් මේ සඳහා අවශ්ය මූල්ය ප්රතිපාදන සපයා ඇත.
මෙම අතිනවීන යන්ත්ර 5 ස්ථාපිත කිරීමට නියමිත ප්රධාන රෝහල් වන්නේ,
කොළඹ ජාතික රෝහල
ගාල්ල කරාපිටිය ජාතික රෝහල
නුවර ජාතික රෝහල
අනුරාධපුර ශික්ෂණ රෝහල
අපේක්ෂා රෝහල
මෙම ප්රධාන වැඩපිළිවෙළට අමතරව, පවතින හදිසි අවශ්යතාව සැලකිල්ලට ගනිමින් ත්රිකුණාමලය සහ නුවරඑළිය දිස්ත්රික් මහ රෝහල් දෙක සඳහා ද භාවිත කරන ලද මැමෝග්රැෆි යන්ත්ර දෙකක් ලබාදීමට අමාත්යාංශය පියවර ගෙන ඇත.
මේ වනවිට දිවයින පුරා රෝහල්වල සක්රීය සේවයේ පවතින්නේ මැමෝග්රැෆි යන්ත්ර 16 ක් පමණි. නව යන්ත්ර ද සමඟින් එම සංඛ්යාව 23 දක්වා ඉහළ යනු ඇත. දැනට කොළඹ, කරාපිටිය, කළුබෝවිල, පේරාදෙණිය, මඩකලපුව, අනුරාධපුර, රාගම, යාපනය, පොළොන්නරුව, කුරුණෑගල, බදුල්ල, රත්නපුර, කල්මුණේ, ත්රිකුණාමලය සහ නුවරඑළිය යන රෝහල්වල මෙම යන්ත්ර ක්රියාත්මක වේ.
රජයේ සෞඛ්ය මාර්ගෝපදේශවලට අනුව රෝගියෙකු ලියාපදිංචි වී දින කිහිපයක් ඇතුළත සියලුම පරීක්ෂණ අවසන් කළ යුතු වුවද, අධික රෝගීන් සංඛ්යාව සහ පවතින සීමිත යන්ත්ර පහසුකම් හේතුවෙන් වර්තමානයේ මැමෝග්රැෆි පරීක්ෂණයක් කරගැනීම සඳහා සති කිහිපයක සිට මාස කිහිපයක් දක්වා දිගු පොරොත්තු ලේඛන (Waiting lists) පවතී.
සෞඛ්ය අමාත්යාංශය පෙන්වා දෙන්නේ මෙම නවීන තාක්ෂණික යන්ත්ර සෞඛ්ය පද්ධතියට එක්වීමත් සමඟ එම පොරොත්තු ලේඛන අවම කරමින්, රෝගීන්ට ගුණාත්මක, කඩිනම් සහ කාර්යක්ෂම සේවාවක් සැපයීමට හැකිවන බවයි.
