බංග්ලාදේශයේ සරම්ප රෝගය වේගයෙන් පැතිර යාම හේතුවෙන් මේ වන විට දරුවන් 500කට වැඩි පිරිසක් මියගොස් තිබේ.

ඩකා අගනුවර රෝහල් මේ වන විට රෝගීන්ගෙන් පිරී ඉතිරී ගොස් ඇති අතර, සරම්ප රෝගීන් සඳහාම වෙන්වූ විශේෂ වාට්ටු ද පිහිටුවා ඇති බව සඳහන් වේ.

කෙසේ වෙතත්, දැඩි සත්කාර ඒකකවල ඇඳන් හිඟකම හේතුවෙන් වෛද්‍ය අංශ දැඩි අර්බුදයකට මුහුණ දී සිටී.

එරට සෞඛ්‍ය දෙපාර්තමේන්තුවේ සංඛ්‍යාලේඛනවලට අනුව, ගත වූ පැය 24 තුළ පමණක් දරුවන් 13 දෙනෙකු මියගොස් ඇති අතර, මාර්තු 15 වෙනිදා සිට මේ දක්වා වාර්තා වී ඇති සමස්ත මරණ සංඛ්‍යාව 512ක් දක්වා ඉහළ ගොස් ඇත.

මෙම වසංගතය මර්දනය කිරීම සඳහා බංග්ලාදේශය පුරා මහා පරිමාණ එන්නත්කරණ වැඩසටහනක් ආරම්භ කර ඇති අතර, එක්සත් ජාතීන්ගේ ළමා අරමුදලේ එරට ප්‍රධානී රනා ෆ්ලවර්ස් ප්‍රකාශ කර ඇත්තේ මේ වන විට දරුවන් මිලියන 18කට එන්නත් ලබා දී ඇති බවය.

නමුත් මෙම එන්නත්කරණයේ සම්පූර්ණ ප්‍රතිඵල දැකීමට තවත් මාස කිහිපයක් ගතවනු ඇති බව සෞඛ්‍ය දෙපාර්තමේන්තුව පවසයි.

යුනිසෙෆ් ආයතනය බදාදා ප්‍රකාශ කළේ, 2024 වසරේදී බංග්ලාදේශයේ පැවති ඒකාධිපති රජය පෙරළා දැමූ මහජන නැගිටීම සහ ඉන් පසුව ඇතිවූ අවුල් සහගත තත්ත්වය හේතුවෙන් දරුවන්ට නිසි කලට එන්නත් ලබාදීමේ වැඩපිළිවෙළ අඩාල වූ බවය.

මේ හේතුවෙන් විශාල දරුවන් සංඛ්‍යාවකට රෝගයෙන් ආරක්ෂා වීමේ අවස්ථාව අහිමි වී තිබේ.

සරම්ප යනු කැස්ස සහ කිවිසුම් යාම මඟින් ඉතා වේගයෙන් බෝවන රෝගයක් වන අතර, රෝගය වැළඳුණු පසු ඒ සඳහා නිශ්චිත ප්‍රතිකාරයක් නොමැත.

රෝගය උත්සන්න වීමෙන් මොළය ඉදිමීම සහ දරුණු ශ්වසන අපහසුතා ඇති විය හැක. මෙම රෝගය ඕනෑම අයෙකුට වැළඳිය හැකි වුවද, දරුවන් අතර වඩාත් බහුලව දක්නට ලැබේ.

සෞඛ්‍ය සේවකයන් පවසන්නේ මෙයින් වඩාත්ම පීඩාවට පත්ව ඇත්තේ අඩු ආදායම්ලාභී පවුල්වල මන්දපෝෂණයෙන් පෙළෙන දරුවන් බවය.

ඔවුන්ගෙන් බහුතරයකට නිතිපතා ලබාදෙන එන්නත් මඟ හැරී තිබීම හෝ දුර්වල පෝෂණය හේතුවෙන් ප්‍රතිශක්තිකරණය අඩු වීම හෝ මෙම හේතු දෙකම බලපා තිබේ.

වත්මන් වසංගත තත්ත්වය තුළ බංග්ලාදේශයෙන් වාර්තා වන රෝගීන්ගෙන් බහුතරය මාස 6ත් අවුරුදු 5ත් අතර වයසේ පසුවන දරුවන් වේ.

වෛද්‍යවරුන් පවසන්නේ රෝහල් වෙත ඇතුළත් කරන විටත් බොහෝ දරුවන් අසාධ්‍ය තත්ත්වයේ පසුවන බවයි.