සිය නිල ෆේස්බුක් ගිණුමේ විශේෂ සටහනක් තබමින් පාර්ලිමේන්තු මන්ත්රී ආචාර්ය හර්ෂ ද සිල්වා සිය දේශපාලන අනාගතය, පක්ෂ ස්ථාවරය සහ රට පිළිබඳ දැක්ම සම්බන්ධයෙන් ප්රකාශයක් සිදුකර තිබේ.
තම පවුලේ කිසිවෙකු දේශපාලනයට සම්බන්ධ නොවූ බව සඳහන් කරන ඔහු, තරුණ වියේ සිට ශ්රී ලංකාව දියුණු රාජ්යයක් බවට පත්කිරීමේ අරමුණින් තමන් දේශපාලනයට පිවිසි බව පවසා ඇත.
තමන් පටු දේශපාලන වාසි වෙනුවෙන් කිසිදු තීරණයක් නොගන්නා බව අවධාරණය කරන ඔහු, මධ්ය දක්ෂිණාංශික දේශපාලන කඳවුරෙන් ඉවත්වීමේ කිසිදු අදහසක් නොමැති බවද සඳහන් කර තිබේ.
වර්තමාන ආණ්ඩුවට දූරදර්ශී ආර්ථික දැක්මක් නොමැති බව චෝදනා කරන ඔහු, ලෝකයට විවෘත ආර්ථික ප්රතිපත්ති නොමැතිව රට ගොඩනැගිය නොහැකි බවද පෙන්වා දී ඇත.
එමෙන්ම, ආණ්ඩුවට එක්වීම සම්බන්ධයෙන් කිසිදු සාකච්ඡාවක් සිදුකර නොමැති බවත්, පක්ෂය තුළ ගැටලු ඇති කිරීමේ අරමුණින් ඇතැම් ප්රචාර සිදුකරන බවත් ඔහු සඳහන් කරයි.
රටේ ආර්ථික සමෘද්ධිය වෙනුවෙන් වත්මන් ආණ්ඩුවට එරෙහි දේශපාලන සටන තවදුරටත් ශක්තිමත් කරන බවත්, අවශ්ය මොහොතක රට වෙනුවෙන් ඕනෑම අභියෝගයක් භාර ගැනීමට සූදානම් බවත් ඔහු වැඩිදුරටත් අවධාරණය කර තිබේ.
- උපුටා ගැනීම -
රටට අලුත් යුගයක් අවශ්යයයි !
මගේ පවුලේ කිසිවෙක් දේශපාලනයට සම්බන්ධ නෑ. තරුණ වයසේදී මගේ හිතේ රට ගැන කැක්කුමක් ඇතිවුණා. මගේ රටත් දවසක ලෝකයේ දියුණු රටක් විය යුතුයි. ඒ සඳහා මා කැපවිය යුතුයි යන හැඟීමයි මා දේශපාලනයට තල්ලු කළේ. අදටත් ඒ හැඟීම එලෙසමයි.
දවසක ඒ බලාපොරොත්තුව ඉටුකර ගන්නයි මා වැඩකරන්නේ. ඒ නිසා, මම පටු දේශපාලන වාසි බලාගෙන කිසිදු දේශපාලන තීරණයක් ගන්නෙ නෑ. මාව මධ්ය දක්ෂිණාංශික කඳවුරෙන් යවන්න සමහරුන්ට වුවමනාවක් තියන බවක් පේනවා. ඒක කවදාවත් වෙන්නෙ නෑ. එම කඳවුරට දිනෙක නායකත්වය ලබාදීම දක්වා මගේ දේශපාලනය අනිවාර්යෙන්ම ඉදිරියට ඇදෙනවා.
මේ ආණ්ඩුව අසාර්ථකයි. දූරදර්ශී ආර්ථික දැක්මක් මේ ආණ්ඩුවට නැතිබව පැහැදිලියි. ලෝකයට විවෘත නොවුණු වකුටු වූ අදහස්වලින් මේ ආණ්ඩුවට මේ රට හදන්න බෑ. ඒක අනාගතයේදී තව තවත් පැහැදිලි වේවි.
මේ ආණ්ඩුවට මම යන්නෙ නෑ. කවදාවත් එවැනි සාකච්ඡාවක් කරලත් නෑ. සමගි ජන බලවේගය තුළ ප්රශ්නයක් නිර්මාණය කිරීමටත් යම් පිරිසකට වුවමනා වී තිබෙන බවත් මෙම ප්රචාරණවලින් පේනවා.
ආර්ථික සමෘද්ධියෙන් යුතු දියුණු ශ්රී ලංකාවක් ගොඩනැගීම වෙනුවෙන් මේ ආණ්ඩුවට එරෙහි සටන මා ඉදිරියේදී වැඩි කරනවා. ඒ සෑම දෙයකටම විරුද්ධ වෙමින් නෙවෙයි. හොඳ දෙයට හොඳයි කියන දියුණු දේශපාලන සංස්කෘතිය ඉදිරියට ගෙන යමින්.
ඒ වගේම අවශ්ය මොහොතේදී රට වෙනුවෙන් ඕනෑම භාරදූර අභියෝගයක් භාරගැනීමට මා සූදානම් බවත් මා අවධාරණය කරනවා. රටට අලුත් යුගයක් අවශ්යයයි.
- උපුටා ගැනීම අවසන් -
