මෙරට සෞඛ්ය පද්ධතිය තුළ රෝග නිවාරණ සහ ප්රතිකාර සේවා වඩාත් කාර්යක්ෂමව ජනතාව වෙත සමීප කරවීම මෙන්ම එම කටයුතුවලදී සිදුවන අඩුපාඩු අවම කරගනිමින් ප්රමුඛතා අනුව සම්පත් කාර්යක්ෂමව යෙදවීම ඉලක්ක කර ගනිමින් දිස්ත්රික් මට්ටමින් සෞඛ්ය සේවා සම්බන්ධීකරණය ශක්තිමත් කිරීම පිළිබඳව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ අවධානය යොමුව තිබේ.
ඒ අනුව මෙරට සියලුම දිස්ත්රික්ක ආවරණය වන පරිදි පාර්ලිමේන්තු මන්ත්රීවරුන් පිරිසක් දිස්ත්රික් සම්බන්ධීකරණ නිලධාරීන් ලෙස පත් කිරීමට අමාත්ය මණ්ඩලය වෙත පසුගියදා සෞඛ්ය හා ජනමාධ්ය අමාත්යවරයා ඉදිරිපත් කරන ලද කැබිනට් පත්රිකාවට අමාත්ය මණ්ඩලය අනුමැතියද හිමිවිය.
මධ්යම රජය සහ පළාත් සභා මගින් පාලනය වන සෞඛ්ය ආයතන අතර පවතින සම්බන්ධීකරණ දුර්වලතාද මගහරවා ගනිමින් වඩා කාර්යක්ෂම රෝග නිවාරණ හා ප්රතිකාර සේවා වර්ධනය කිරීම මෙම පියවරෙහි මූලික අරමුණ වේ.
සෞඛ්ය අමාත්යාංශය සඳහන් කරනුයේ මීට පෙර පැවති ක්රමය යටතේ ප්රාදේශීය මට්ටමේ සෞඛ්ය ගැටලු නිසි ලෙස හඳුනා ගැනීම සහ ඒවා ජාතික සැලසුම්වලට ඇතුළත් කිරීමේදී යම් යම් ප්රායෝගික දුෂ්කරතා මතුවී තිබීම මෙවන් පත් කිරීමක් සිදු කිරීමට මූලික වී ඇති බවය.
ඒ අනුව පත්කරනු ලබන දිස්ත්රික් සම්බන්ධීකරණ නිලධාරීන් වෙත පැවරීමට යෝජිත කාර්යභාරය සහ වගකීම්ද යෝජනා කර ඇති අතර ඒ යටතේ,
• ජන සහභාගිත්වය ප්රමුඛ කර ගනිමින් දිස්ත්රික් මට්ටමේ සෞඛ්ය අවශ්යතා හඳුනා ගැනීම සහ ඒවා ප්රමුඛතා අනුව සකස් කිරීම,
• එම අවශ්යතා ජාතික හා පළාත් සෞඛ්ය සැලසුම් සමඟ ඒකාබද්ධ කිරීම සඳහා පහසුකම් සැලසීම,
• රේඛීය හා පළාත් සෞඛ්ය ආයතන අතර සම්පත් කාර්යක්ෂම භාවිතා කිරීම සහ සම්බන්ධීකරණය ශක්තිමත් කිරීම,
• අමාත්යාංශ ප්රතිපත්ති අනුව ප්රාදේශීය සංවර්ධන සැලසුම් ක්රියාත්මක කිරීම සඳහා සම්බන්ධීකරණය කිරීම,
• ප්රමුඛ ව්යාපෘති හඳුනා ගෙන අමාත්යාංශයට නිර්දේශ කිරීම,
• දැනට ක්රියාත්මක ව්යාපෘතිවල ප්රගතිය නිරීක්ෂණය කර ඒවා නියමිත කාල රාමුව තුළ සාර්ථකව නිම කිරීමට සහාය වීම, ඇතුළු කරුණු ගණනාවක් වේ.
මෙම ව්යුහය හරහා පුළුල් ජනගහණයකට සෞඛ්ය සේවා සපයනු ලැබුවද රේඛීය හා පළාත් පරිපාලන පද්ධති වෙන්ව ක්රියාත්මක වීම හේතුවෙන් දිස්ත්රික් මට්ටමින් සම්බන්ධීකරණයේ අඩුපාඩු ඇතිවීම, සම්පත් පරිභෝජනයේ අකාර්යක්ෂමතාව සහ ප්රාදේශීය අවශ්යතා සම්පූර්ණ ලෙස ජාතික සැලසුම්වලට පිළිබිඹු නොවීම වැනි ගැටළු නිරීක්ෂණය වී ඇති බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා අදාළ කැබිනට් පත්රිකාව ඉදිරිපත් කරමින් මෙම කරුණු දක්වා ඇත.
විශේෂයෙන්ම ජන සහභාගීත්වය සීමිත වීම හේතුවෙන් ප්රාදේශීය මට්ටමේ සෞඛ්ය ගැටළු හඳුනාගැනීම සහ විසඳීම ප්රමාණවත් ලෙස සිදු නොවන බව ද ඔහු වැඩිදුරටත් අවධාරණය කර ඇත.
ඒ අනුව මෙලෙස දිස්ත්රික් සම්බන්ධීකරණ නිලධාරීන් ලෙස පහත නම් සඳහන් මන්ත්රීවරුන් අදාළ දිස්ත්රික් සඳහා එම කැබිනට් පත්රිකාව මඟින් නම් කර ඇත.
අනුරාධපුර - සුසන්ත කුමාර නවරත්න , බදුල්ල - රවින්ද්ර බණ්ඩාර , මඩකලපුව - කන්දසාමි ප්රභු , කොළඹ - වෛද්ය නජිත් ඉන්දික , දිගාමඩුල්ල /අම්පාර එම්.එම්. සුගත් රත්නායක , ගාල්ල - වෛද්ය නිශාන්ත සමරවීර , ගම්පහ - ධර්මප්රිය විජේසිංහ , හම්බන්තොට - වෛද්ය සදරුවන් මදරසිංහ , යාපනය - වෛද්ය එස්. ශ්රී භවනන්දරාජා , කෑගල්ල - ආර්.එම්. සමන්ත රණසිංහ , කළුතර - වෛද්ය නිහාල් අබේසිංහ , මහනුවර - තනුර දිසානායක , කුරුණෑගල - වෛද්ය ජගත් ගුණවර්ධන , මාතලේ - දීප්ති නිරංජනී වසලාගේ මෙනවිය, මාතර - ලාල් ප්රේමනාත් , මොණරාගල - එච්.එම්. සරත් කුමාර , නුවරඑළිය - ටී. මංජුල සුරවීරආරච්චි, පොළොන්නරුව - පද්මසිරි බණ්ඩාර , පුත්තලම - ගයාන් ජනක , රත්නපුර - වෛද්ය ජනක සේනාරත්න , ත්රිකුණාමලය - රොෂාන් අක්මීමන , වන්නි - සෙල්වතම්බි තිලකනාදන් යන මහත්ම මහත්මීන් වේ.
මෙම නව ක්රමවේදය හරහා සෞඛ්ය සේවාවේ ගුණාත්මකභාවය ඉහළ නැංවීමටත්, ජනතාවට වඩාත් පහසු සහ විශ්වාසනීය සෞඛ්ය සේවාවක් ලබා දීමටත් සෞඛ්ය හා ජනමාධ්ය අමාත්යාංශය අපේක්ෂා කර තිබේ.
