චෙම්මනි මිනී වළේ ඊළඟ අදියරේ කැණීම් කටයුතු අප්රේල් මස 20 වෙනිදා යළි ආරම්භ කරන බව අමාත්ය බිමල් රත්නායක මහතා පවසයි.
අමාත්යවරයා මේ බව ප්රකාශ කළේ, අද (20) පාර්ලිමේන්තුවේදී අදහස් පළ කරමිනි.
"චෙම්මනි සමූහ මිනීවල සම්බන්ධ ප්රශ්නය මතු කළා. එතුමාගේ චෝදනාව වුණේ, අධිකරණ ඇමතිතුමාට අපි සමූහ මිනී වළේ පරීක්ෂණ කරන්නේ නැහැ. අපි ජාත්යන්තර වශයෙනුත් එක්සත් ජාතීන්ටත් පොරොන්දු වෙලා තියෙනවා. එසේ තිබියදීත් අපි කරන්නේ නැහැ කියලා.
අපි අඩුපාඩුකම් පිළිගන්න ලෑස්ති දේශපාලන ව්යාපාරයක්. ඇත්තටම ගත්තට පස්සේ ඉතාමත් කණගාටුව හිතන දෙයක් තමා කරපු දේ අගය නොකරාට කමක් නෑ. කරපු දේ දැනගෙන විවේචනය කරන එක තමයි වැරැද්ද.
ගරු මැතිනියනි 1999 තමයි මෙම සමූහ මිනී වළෙන් ඇටකටු සොයාගන්නේ. එදා සිට 2024 දක්වා අවුරුදු 25ක් ගත වුණා. ඒ අවුරුදු 25ටම චෙම්මනි සමූහ මිනී වළෙන් මිනිස් ඇට සැකිලි 15යි සොයාගත්තේ.
2015 සිට 2019 දක්වා තිබුණු ඒ ආණ්ඩුව යටතේ තමිල් අරසු කට්චි පක්ෂය විශේෂයෙන් මේකේ හිටපු නායකයන් සුමන්දිරන් මන්ත්රීවරයා වගේ අය විපක්ෂයේ හිටියාට සුවිශේෂ බලපෑමක් කළා රනිල් වික්රමසිංහ මැතිතුමා අගමැතිධුරය දරපු කාලයේදී.
ඔවුන්ට ඇමතිවරුන්ට වඩා බලයක් තිබුණා. අවසන් කාලයේදී ප්රදේශයේ වැඩ කටයුතු කරන්න විශාල මුදලක් දුන්නා. අපි ඒකේ විශේෂ වරදක් දකින්නේ නෑ. නමුත් ඒ අවුරුදු පහේදී ඇයි චෙම්මනි මිනීවළ අමතක වුණේ. තමිල් අරසු කච්චි පක්ෂ නායකයන්ට.
අපි බලය ගත්තේ 2024 සැප්තැම්බර් මාසයේ. පාර්ලිමේන්තු බලය හදාගත්තේ නොවැම්බර් මාසයේ. එදා ඉදන් අද දක්වා මේ මාස 17 තුළදී මේ හොයාගන්නා ලද මිනිස් ඇටසැකිලි ප්රමාණය 239ක් වෙනවා. මෙහෙම කරන ආණ්ඩුවට තමයි චෝදනා කරලා තියෙන්නේ.
චෙම්මනි මිනීවළ තියෙන කොට්ඨාසයත් අපි දිනලා තියෙන්නේ. ඒකේ මන්ත්රීතුමා ජාතික ජනබලවේගයේ. අපි මේක සම්පූර්ණ කරුණු දන්නවා. හොයලා තියෙනවා. අපිට ජනවරමක් තියෙනවා.
මේක හොයන්න. මේක විතරක් නෙවෙයි මාතලේ මිනීවළ ගැනත් හොයනවා. අධිකරණ ක්රියාවලියක් හරහා යුක්තිය ඉටු කරනකොට කාලයක් යනවා. අප්රේල් විස්ස නැවත කැණීම් පටන් ගන්නවා."
