ඔස්ට්රේලියාවෙන් දේශපාලන රැකවරණ ලබාගැනීම සඳහා ඉදිරිපත් කළ ඉල්ලීම් ඉල්ලා අස්කරගත් ඉරාන ජාතික කාන්තා පාපන්දු කණ්ඩායමේ ක්රීඩිකාවන් පස්දෙනෙකු යළි ඉරානයට පැමිණ තිබේ.
මැලේසියාව සහ ඕමාන් රාජ්යය හරහා ගුවන් මගින් පැමිණි මෙම ක්රීඩිකාවන් පිරිස, පසුගිය බදාදා පස්වරුවේ තුර්කි දේශසීමාව හරහා ඉරානයට ඇතුළු වන අයුරු දක්නට ලැබුණි.
ඔවුන් සියල්ලන්ම එම අවස්ථාවේදී සිය කණ්ඩායම් නිල ඇඳුමෙන් සැරසී සිටි බව සඳහන් වේ.
පසුගිය මාර්තු 2 වෙනිදා ආසියානු කුසලාන තරඟාවලියේ ආරම්භක තරඟයේදී ඉරාන ජාතික ගීය ගායනා නොකර නිහඬව සිටීමට මෙම කණ්ඩායම කටයුතු කළේය.
අමෙරිකාව සහ ඊශ්රායලය ඉරානයට එරෙහිව යුද්ධ ප්රකාශ කර දින කිහිපයකට පසු මෙය සිදුවිය.
මෙම ක්රියාව හේතුවෙන් සිය රට තුළ තමන්ට දඬුවම් විඳීමට සිදුවනු ඇතැයි බිය වූ ක්රීඩිකාවන් පිරිසක්, ඔස්ට්රේලියාවේදී මානුෂීය වීසා සඳහා ඉල්ලුම් කළහ.
ඔස්ට්රේලියානු ස්වදේශ කටයුතු අමාත්ය ටෝනි බර්ක් මහතා පවසා සිටියේ, ආරක්ෂිත ස්ථානයක රැඳී සිටි මෙම ක්රීඩිකාවන්ට ඔස්ට්රේලියාවේ ජීවත් වීමට, රැකියාව කිරීමට සහ ඉගෙනීමට අවසර ලැබෙන පරිදි එම වීසා අයදුම්පත් අනුමත කළ බවය.
කෙසේ වෙතත්, මානව හිමිකම් ක්රියාකාරීන් පෙන්වා දෙන්නේ ඉරානයේ සිටින මෙම ක්රීඩිකාවන්ගේ පවුල්වල සාමාජිකයන්ට එල්ල වූ දැඩි තර්ජන හමුවේ ඔවුන් සිය තීරණය වෙනස් කරන්නට ඇති බවය.
ඉරාන රජයේ මාධ්ය විසින් මෙම ක්රීඩිකාවන් "ද්රෝහීන්" ලෙස හඳුන්වමින් ඔවුන්ට දඬුවම් කළ යුතු බවට ප්රකාශ නිකුත් කර තිබුණි.
මෙම පීඩනය හමුවේ කණ්ඩායමේ නායිකා සහ්රා ගන්බාරි ඇතුළු පස්දෙනෙකු යළි මෙලෙස ඉරානයට පැමිණ ඇත.
අනෙක් ක්රීඩිකාවන් තිදෙනා සහ්රා සොල්තාන් මෙෂ්කේකාර්, මෝනා හමූඩි සහ සහ්රා සර්බාලි ලෙස හඳුනාගෙන තිබේ.
මේ අතර ඉරාන ක්රීඩා අමාත්යාංශය ප්රකාශ කළේ තම ක්රීඩිකාවන්ගේ "දේශප්රේමීත්වය" හමුවේ සතුරාගේ සැලසුම් පරාජය වූ බවය.
අමාත්ය බර්ක් මහතා සඳහන් කළේ, මෙම ක්රීඩිකාවන් මෙවැනි තීරණයක් ගන්නේ කුමන පසුබිමක් යටතේද යන්න පිළිබඳව ඔස්ට්රේලියානු රජයට මැදිහත් විය නොහැකි බවයි.
මෙම කණ්ඩායමෙන් ක්රීඩිකාවන් දෙදෙනෙකු පමණක් තවමත් ඔස්ට්රේලියාවේ දේශපාලන රැකවරණ සහිතව රැඳී සිටින බව වාර්තා වේ.
