ඉන්දියානු සාගරය ගැටුම් කලාපයක් නොව ශිෂ්ටාචාර අතර පාලමක් වූ බව ශ්රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්රී නාමල් රාජපක්ෂ පවසයි.
ඔහු මේ බව ප්රකාශ කළේ අද (18) දින ඉන්දියාවේ නවදිල්ලි නුවරදී WION ගෝලීය සමුළුව අමතමිනි.
මෙහිදී වැඩිදුරටත් අදහස් දැක්වූ නාමල් රාජපක්ෂ මහතා,
"අප හමුවන්නේ ගෝලීය පද්ධතිය ප්රබල පරිවර්තනයකට භාජනය වෙමින් පවතින මොහොතක. වෙළෙඳ මාර්ග අවහිර වෙමින් පවතිනවා. තාක්ෂණික තරඟකාරිත්වය ජාතීන් අතර බලතුලනය නැවත හැඩගස්වමින් පවතිනවා. ලොව විවිධ කලාපවල යුද්ධ දිගින් දිගටම ඇවිලෙමින් පවතිනවා. නිරවි යුද්ධයෙන් පසු බිහිවූ ලෝකය දැන් වෙනස් වෙමින් පවතිනවා."
"කලක් දුරස්ථ හෝ ද්විතීයික ලෙස සැලකූ උපායමාර්ගික කලාප දැන් ගෝලීය දේශපාලනයේ කේන්ද්රස්ථානය බවට පත්වෙමින් තිබේ. ඉන් එක් කලාපයක් වන්නේ ඉන්දියන් සාගරයයි."
"වසර දහස් ගණනක් පුරා ඉන්දියානු සාගරය ගැටුම් කලාපයක් නොව ශිෂ්ටාචාර අතර පාලමක් වුණා. ඉන්දියානු සාගරය සමාජයන් බෙදා වෙන් කරනවා වෙනුවට ඒවා එකිනෙක සම්බන්ධ කළා."
"ඉන්දියාව සහ ශ්රී ලංකාව අතර සබඳතාව එම සම්බන්ධතාවයේ පැරණිතම උදාහරණයක්."
"ගෝලීය තෙල් නැව්ගත කිරීම්වලින් තුනෙන් දෙකක් පමණ මෙම මුහුදු තීරය හරහා ගමන් කරන අතර, ලොව බහාලුම් ගමනාගමනයෙන් අඩක් පමණ එහි මුහුදු මාර්ග ඔස්සේ සිදුවෙනවා."
"මෙම මාර්ගවලට තර්ජන එල්ලවූ විට, එහි ප්රතිවිපාක මුළු ලොවටම දැනේ. මෑතකාලීන ගෝලීය සිදුවීම් මෙම ස්ථාවරත්වය කෙතරම් බිඳෙනසුලු විය හැකිද යන්න අපට මතක් කර දෙනවා."
"මැදපෙරදිග නොසන්සුන්තාවන් බලශක්ති වෙළෙඳපොළ සහ ගෝලීය ආරක්ෂාව කෙරෙහි දිගින් දිගටම බලපාන අතර ප්රධාන බලවතුන් අතර උපායමාර්ගික එදිරිවාදිකම් සමුද්රීය කලාප තුළ වඩ වඩාත් දෘශ්යමාන වෙයි. මේ නිසාම, ඉන්දියන් සාගරයේ ස්ථාවරත්වය යළිත් වරක් තීරණාත්මක වී තිබෙනවා."
"උපායමාර්ගිකව සංවේදී කලාපවල පිහිටි රටවල් සඳහා, විදේශ ප්රතිපත්තිය සමතුලිතතාවය, දුරදක්නා නුවණ සහ විනය මගින් මෙහෙයවිය යුතුයි. අපගේ ස්වෛරීභාවය ආරක්ෂා කර ගත යුතු අතර අපගේ සමුද්රීය කලාපය සුරක්ෂිත කළ යුතුයි."
"ශ්රී ලංකාවේ උපායමාර්ගික පිහිටීම සහ යටිතල පහසුකම් ඉන්දියාවේ ආර්ථික පරිමාණයට අනුපූරක වන අතර අපගේ රටවල් දෙකට එක්ව කලාපීය ස්ථාවරත්වය සහ සමෘද්ධිය ශක්තිමත් කළ හැකියි."
"කෘතිම බුද්ධිය, සයිබර් ආරක්ෂණය, ඩිජිටල් යටිතල පහසුකම් සහ අභ්යවකාශ තාක්ෂණය තවදුරටත් හුදු ආර්ථික අංශ පමණක් නොවේ. ඒවා ඉදිරි දශක කිහිපය තුළ ගෝලීය බලය හැඩගස්වන උපායමාර්ගික ක්ෂේත්ර වෙයි."
"මගේ පරම්පරාවට උරුම වී ඇත්තේ ගෝලීය වෙනස්කම්වලට හුදෙක් ප්රතිචාර දැක්වීම පමණක් නොව, එය මෙහෙයවීමට සහ හැඩගැස්වීමට ඇති වගකීමයි."
"එදිරිවාදිකම්වලට වඩා සහයෝගීතාවය ඉහළින් පවතින සහ ජාත්යන්තර නීතිය මගින් ස්ථාවරත්වය මෙහෙයවන ලෝකයක් ගොඩනැගීමේ වගකීමයි."
"ඉන්දියන් සාගරය සැමවිටම පැවති ආකාරයටම - ශිෂ්ටාචාරයන් අතර පාලමක් ලෙස පැවතිය යුතුයි. ඉන්දියාව, ශ්රී ලංකාව සහ ඉන්දියන් සාගර කලාපයේ රටවල් මෙම මුහුදු තීරය විවෘත, සුරක්ෂිත සහ සහයෝගීතාවයෙන් යුක්තව පවත්වා ගැනීමට එක්ව කටයුතු කළ යුතුයි."
"මන්ද, ඉන්දියන් සාගරය ස්ථාවර නම් ගෝලීය ආර්ථිකයද ස්ථාවර වනු ඇත."
"එය සාමයේ, සහයෝගීතාවයේ සහ පොදු සමෘද්ධියේ සාගරයක් ලෙස පවතින බව සහතික කිරීම අපේ පරම්පරාවේ වගකීමයි."
