මෙරට තුළ මේ වන විට ඩෙංගු රෝගීන්ගේ වර්ධනයක් පෙන්නුම් කරන බව ජාතික ඩෙංගු මර්දන ඒකකයේ වැඩබලන අධ්යක්ෂ වෛද්ය කපිල කන්නන්ගර මහතා පවසයි.
මාධ්ය හමුවකට එක්වෙමින් වෛද්යවරයා පෙන්වා දෙන්නේ පසුගිය ජනවාරි 01 වැනිදා සිට ඊයේ (09) දින දක්වා ගතවූ දවස් 9 තුළ පමණක් දිවයින පුරා ඩෙංගු රෝගීන් 2,420ක් වාර්තා වී ඇති බවය.
මින් වැඩිම ඩෙංගු රෝගීන් ප්රමාණයක් වාර්තා වී ඇත්තේ බස්නාහිර පළාතෙන් බවත් ඒ අනුව බස්නාහිර පළාත තුළ ඩෙංගු රෝගීන් 1,317ක් වාර්තා වී ඇති බවත් දකුණු පළාතෙන් 361ක් මධ්යම පළාතෙන් 192ක්, සබරගමුව පළාතෙන් 165ක්, නැගෙනහිර උතුරු සහ වයඹ පළාත්වල 4%ක් ලෙස ඩෙංගු රෝගීන් වාර්තා වී ඇති බව වෛද්යවරයා පැවසුවේය.
මෙම පළාත්වලින් දිස්ත්රික්ක වශයෙන් ගත් කළ වැඩිම ඩෙංගු රෝගීන් ප්රමාණයක් වාර්තා වී ඇත්තේ කොළඹ දිස්ත්රික්කයෙන් බවත් එම දිස්ත්රික්කයෙන් ඩෙංගු රෝගීන් 625ක් වාර්තා වන බවත් කොළඹ දිස්ත්රික්කයේ කොළඹ නගර සභා සීමාව තුළ රෝගීන් 165ක් වාර්තා වී ඇති බවද වෛද්යවරයා පෙන්වා දුන්නේය.
මීට අමතරව ගම්පහ දිස්ත්රික්කය තුළ රෝගීන් 393ක් සහ කළුතර දිස්ත්රික්කයෙන් 128ක් ද රෝගීන් වාර්තා වී ඇති බවත් වෛද්යවරයා පැවසුවේය.
අනෙකුත් පළාත් ආශ්රිතව ගත් විට දකුණු පළාත තුළ ගාල්ල සහ මාතර යන දිස්ත්රික්කවල ඩෙංගු රෝගීන් සැලකිය යුතු මට්ටමක් වාර්තා වී ඇති බවත් ගාල්ල දිස්ත්රික්කයෙන් රෝගීන් 148 සහ මාතර දිස්ත්රික්කයෙන් 162ක් වාර්තා වී ඇති බවද වෛද්යවරයා සඳහන් කළේය.
එමෙන්ම මහනුවර දිස්ත්රික්කට තුළ රෝගීන් 140ක් ද රත්නපුර දිස්ත්රික්කයෙන් 113ක්ද වාර්තා වී ඇති බවත් ඒ අනුව මෙම දිස්ත්රික්ක කිහිපය තුළ ඩෙංගු රෝගීන් අවධානය යොමු කළ යුතු මට්ටමකින් වාර්තා වී ඇති බව පෙන්වා දුන් වෛද්යවරයා සඳහන් කළේ දැනට පවතින වර්ෂාපතනය සහ ඇතිවූ ආපදා තත්ත්වය මෙම ඩෙංගු රෝගීන් වාර්තා වීම ඉහළ යාමට බලපා ඇති බවය.
එමෙන්ම කාලගුණ විද්යා දෙපාර්තමේන්තුව විසින් ලබා දී ඇති පුරෝකථන අනුව ඉදිරි කාලයේදීත් වර්ෂාපතන තත්ත්වයන් පෙන්නුම් කරන බැවින් මේ සම්බන්ධව අවධානය යොමු කළ යුතු බවත් වෛද්යවරයා පෙන්වා දුන්නේය.
මේ හේතුවෙන් මදුරුවන් බෝවන ස්ථාන විනාශ කිරීම මෙන්ම මදුරුවන් බෝවීම වළක්වා ගැනීමද අත්යවශ වන බව පෙන්වා දුන් වෛද්යවරයා ඒ සම්බන්ධයෙන් ජනතාව අවධානය යොමු කළ යුතු බවද පෙන්වා දුන්නේය.
