2024 වසරට සාපේක්ෂව 2025 වසරේ දී මාරක රිය අනතුරුවල වර්ධනයක් දක්නට ලැබෙන බව ප්‍රවාහන, මහාමාර්ග සහ නාගරික සංවර්ධන නියෝජ්‍ය අමාත්‍ය ප්‍රසන්න ගුණසේන මහතා පවසයි.

නියෝජ්‍ය අමාත්‍යවරයා මේ බව පැවසුවේ අද (08) පාර්ලිමේන්තුවේදී අදහස් දක්වමිනි.

සිදුව ඇති මාරක අනතුරු විශ්ලේෂණය කළ විට ප්‍රධාන වශයෙන් අනතුරට ලකව ඇත්තේ පදිකයන් සහ යතුරුපැදිකරුවන් බවද නියෝජ්‍ය අමාත්‍යවරයා පෙන්වා දෙයි.

මෙම අනතුරු වැළැක්වීම සඳහා අවශ්‍ය පියවර ගැනීමට මුදල් වෙන්කර ඇති බවත් ඒ සඳහා අවශ්‍ය සැලසුම් ක්‍රියාත්මක කිරීමට කටයුතු කරන බවත් නියෝජ්‍ය අමාත්‍යවරයා පවසයි.

එමෙන්ම දුම්රිය අනතුරු සම්බන්ධයෙන් අදහස් දක්වමින් ඒ මහතා පැවසුවේ ඒ සඳහා ද අවශ්‍ය ක්‍රියාමාර්ග ගන්නා බවයි.

එහිදී මේ සම්බන්ධයෙන් වැඩිදුර අදහස් දැක්වූ නියෝජ්‍ය අමාත්‍යවරයා,

"2024 දී මාරක රිය අනතුරු 2,403ක් වාර්තා වෙලා තියෙනවා. 2025 දී මාරක රිය අනතුරු 2,583 සිදුවෙලා. ඒ කියන්නේ 180කින් මාරක රිය අනතුරු වැඩි වෙලා. බරපතල ලෙස හානි වෙන අනතුරු 7,157ක් වාර්තා වෙනවා 2024 දී. 2025 දී 5,276 දක්වා අඩුකර ගැනීමට හැකි වෙනවා 1,881කින්. ඒ වගේම සුළු තුවාල ලැබූ පිරිස මේ මාරක අනතුරු නිසා 9,996ක් 2024 වසරේදී වාර්තා වෙනවා. 2025 වසරේදී ඒක තව 71කින් වැඩි වෙලා 10067ක් බවට පත් වෙනවා. ඒ වගේම අලාභ හානි ගත්තොත් 5,743ක් වාර්තා වෙනවා 2024 අවුරුද්දේ. 2025 වසරේදී ඒක තරමක් අඩු වෙනවා 1516කින් 4227 විදියට. මේ විදියට ගත්තාම 2024 අවුරුද්දේ සම්පූර්ණ මාර්ග අනතුරු නිසා වෙන මාරක අනතුරු බරපතල හානි සුලු සහ අලාභ හානිත් එක්ක එකතුව ගත්තාම 25,299ක් බවට පත් වෙනවා. 2025 අවුරුද්දේ තරමක් අඩුවෙනවා ඒක 22,153ක් විදියට. මේක සාධනීය තත්ත්වයක් ලෙස බලන්න විදියක් නෑ. මොකද මාරක රිය අනතුරු ප්‍රමාණය වැඩි වෙලා තියෙන නිස‍ා.

ඒ වගේම මාරක රිය අනතුරු වලට මුල් වන රථවාහන මොනවාද කියන එක ගැන අපි පොඩි විමසීමක් සිදු කල විට, මේකෙදි වැඩියෙන්ම අනතුරට ලක් වෙලා තියෙන්නේ පදිකයින්. 2024 වසරේ දී ගතහොත් පදිකයින් 815ක්. ඒ වගේම යතුරුපැදි 781ක්. එතකොට මේ දෙකේ එකතුව තමයි වැඩි ප්‍රමාණයක් රිය අනතුරු වලට හේතු වෙලා තියෙන්නේ. 2025 වසරේදීත් වැඩි වෙනසක් වෙන්නේ නෑ. පදිකයින් 720ක් වෙනකොට යතුරුපැදි 713ක් බවට සඳහන් වෙනවා.

මේ අනුව මේ සැලසුම් සකස් කරනකොට වැඩි අවධානයක් යොද වන්න වෙනවා පදිකයන් සහ යතුරුපැදිකරුවන් කෙරෙහි.

ඒ වගේම දුම්රිය වල ගැටිලා අනතුරු වෙලා තියෙනවා 2021 අවුරුද්දේ මිනිස්සු 208ක් මිය යනවා. මේක සියදිවි නසා ගැනීම්ද දුම්රියේ ගැටීම්ද කියලා වෙන් කරලා නෑ. 2022 අවුරුද්දේ 414ක් වෙනවා. 2023 වසරේ 402ක් වෙනවා. 2024 වසරේ 407ක් වෙනවා. 2025 වසරේ 374ක් වෙනවා.

එතනත් වැඩි ප්‍රමාණයක් දුම්රියේ ගැටී ජීවිත නැති වෙනවා.

ඒ වගේම දුම්රියේ ගැටීම නිසා වාහනවලට සිදුවන අනතුරු ගත්තාම 2021 වසරේ 61ක් , 2022 වසරේ 78ක්, 2023 වසරේ 74ක් , 2024 වසරේ 66ක්, 2025 වසරේ 75ක් විදියට සඳහන් වෙනවා.

වන අලි දුම්රියේ ගැටීම නිසා 2024 වසරේ 08 දෙනෙකු මිය යනවා. තුවාල ලබනවා 10 දෙනෙක්. එකතුව 18ක් වෙනවා. 2025 වසරේ දී 14ක් මිය යනවා, 8 දෙනෙක් තුවාල ලබනවා"