ශ්‍රී ලංකාවේ අංක 1 සන්නිවේදන සම්පාදකයා වන ඩයලොග් ආසිආටා පීඑල්සී, මෙරට ඩිජිටල් තාක්ෂණික ගමන්මගේ සුවිශේෂී සන්ධිස්ථානයක් සනිටුහන් කරමින්, 5G යුගයක් සඳහා ශ්‍රී ලංකාවේ දොරගුළු විවර කරන ‘Dialog 5G Ultra’ ජාලය වාණිජ වශයෙන් දියත් කරන බව ප්‍රකාශ කරන ලදී.

ඒ අනුව, ශ්‍රී ලංකාව පුරා සජීවී 5G ආවරණ කලාප 220 කට අධික සංඛ්‍යාවක් හරහා ලක්ෂ 15 කට අධික පාරිභෝගිකයින් වෙත මෙම නවීනතම ඩයලොග් 5G ජාලය රැගෙන එනු ලැබේ.

ශ්‍රී ලාංකේය පාරිභෝගිකයින්ට ප්‍රථම වරට 5G වාණිජ ජාලය අත්විඳීමේ හැකියාව මෙලෙසින් උදාකර දෙන ඩයලොග්, ඒ හරහා අනාගත සන්නිවේදන තාක්ෂණය මෙරටට දායාද කිරීමේ පුරෝගාමී කාර්යභාරය තවදුරටත් සනාථ කරයි.

ශ්‍රී ලංකා විදුලි සංදේශ නියාමන කොමිෂන් සභාව (TRCSL) විසින් සංඛ්‍යාත වර්ණාවලි මිලදී ගැනීම සඳහා පවත්වන ලද 5G සංඛ්‍යාත වෙන්දේසියේදී, 3500 MHz සංඛ්‍යාත පරාසයෙන්, 100 MHz ක ප්‍රමාණයක් සහ 27 GHz සංඛ්‍යාත පරාසයෙන්, 200 MHz ක ප්‍රමාණයක් අද දින ඩයලොග් විසින් හිමිකර ගන්නා ලදී. එම සුවිශේෂී පියවරෙන් අනතුරුව, ඩයලොග් 5G ජාලය වාණිජ වශයෙන් මෙලෙස දියත් කිරීමේ කටයුතු සිදුකෙරේ.

නවීනතම, Dialog 5G Ultra ජාලය හරහා ශ්‍රී ලාංකීය පාරිභෝගිකයින්ට, පෙර නොවූ විරූ වේගයක, ඉහළම ක්‍රියාකාරිත්වයේ, කාර්යක්ෂම අන්තර්ජාල පහසුකම් අත්විඳිය හැකි වේ.

ඒ හරහා ගෘහස්ත පාරිභෝගිකයින්ට ඉහළ අන්තර්ජාල අත්දැකීමක් ලබා ගැනීමට හැකිවන අතර, ශ්‍රී ලංකාවේ විවිධ ව්‍යාපාර‌ හා කර්මාන්තවල දියුණුවට ඉවහල් වන තාක්ෂණික විසඳුම් කරා යාමටත් මෙම ජාලය ඉවහල් වේ.

දිවයින පුරා පොදුවේ පුළුල් ආවරණ හැකියාව සලසන 3500 MHz සංඛ්‍යාත සමගින්, 27 GHz සංඛ්‍යාත උපයෝගීකරගනිමින් ව්‍යාපාරික සහ කර්මාන්තමය අන්තර්ජාල අවශ්‍යතාවන් සුපරාලීම සඳහා විශේෂයෙන් උපකාරීවන ඉහළ ධාරිතාවයකින් යුත් Gigabit වේගය පිරිනැමීම පිණිස ඩයලොග් සැදී පැහැදී සිටියි.

මෙම සුවිශේෂී සන්ධිස්ථානය පිළිබඳව අදහස් දක්වමින්, ඩයලොග් ආසිආටා පීඑල්සී හි සමූහ ප්‍රධාන විධායක නිලධාරී සුපුන් වීරසිංහ මහතා මෙසේ පැවසීය.
“Dialog 5G Ultra ජාලය දියත් කිරීම, ශ්‍රී ලංකාව සඳහා ශක්තිමත් අනාගත ඩිජිටල් යටිතල පහසුකම් පිරිනැමීම වෙනුවෙන් අප තැබූ සුවිශේෂී පියවරක්. ඩිජිටල් ආර්ථිකයක් තුළ 5G තාක්ෂණය කියන්නේ වේගවත් සන්නිවේදනය පමණක් නොවෙයි. 5G තාක්ෂණය, වේගය අභිභවා නවෝත්පාදනය, කාර්යක්ෂමතාවය වගේම, සියලු දෙනා ඇතුළත් කරගැනෙන විසඳුම් සඳහා බලගන්වන ප්‍රධානතම සාධකයක්. ශ්‍රී ලංකාවේ විශාලතම 5G ජාලය ලෙස, ඉදිරි වසර දෙක තුළ මේ සඳහා ඇමරිකානු ඩොලර් මිලියන 100 ක් ආයෝජනය කරමින් දිවයින පුරා එම සම්බන්ධතාවය ව්‍යාප්ත කිරීමට අප කැපවී කටයුතු කරනවා. එවිට, ඩිජිටල් ශ්‍රී ලංකාවේ පූර්ණ ප්‍රතිලාභ අත්විඳීමට, සෑම ශ්‍රී ලාංකිකයෙකුටම, ව්‍යාපාරයකටම වගේම සෑම කර්මාන්තයකටම අවස්ථාව සැලසෙන බව අපගේ විශ්වාසයයි. එමෙන්ම 5G සංඛ්‍යාත පරාසයන් වෙන්කරදීම වෙනුවෙන් මනා විනිවිදභාවයකින් යුත් වෙන්දේසියක් පැවැත්වීම වෙනුවෙන් ශ්‍රී ලංකා විදුලි සංදේශ නියාමන කොමිසමට මෙන්ම ශ්‍රී ලංකා රජයටද අපේ ස්තුතිය පිරිනැමෙනවා”

ආරම්භයේ පටන්ම අඛණ්ඩව සිදුකෙරුණු පර්යේෂණ ඇතුළුව, දකුණු ආසියාවේ පළමුවෙන්ම 2G, 3G සහ 4G හඳුන්වාදීමේ සිට දිවයිනේ විශාලතම 5G පර්යේෂණ ජාලය දියත් කිරීම දක්වා දිගහැරුණු ඩයලොග් හි නවෝත්පාදන උරුමය, මෙලෙස Dialog 5G ජාලය වාණිජ වශයෙන් දියත් කිරීමට ශක්තිමත් පදනම බවට පත්ව තිබේ.

Dialog 5G Ultra ජාලය වාණිජ වශයෙන් දියත් කිරීමත් සමග, නවීනතම තාක්ෂණික පහසුකම් හරහා ශ්‍රී ලාංකිකයින්ගේ එදිනෙදා දිවිපැවැත්ම වඩාත් සාර්ථක කර ගැනීමටත්, ව්‍යාපාරික දියුණුව උදාකර ගැනීමටත් සක්‍රීය දායකත්වයක් එමගින් සැලසෙනු ඇත.

මෙම දියත් කිරීමත් සමගින් ශ්‍රී ලාංකික පාරිභෝගිකයින්ට 5G තාක්ෂණය හා එක්ව සැබෑ අන්තර්ජාල අත්දැකීම් විඳගැනීම සඳහාම වූ 5G ස්මාර්ට්ෆෝන්, Data Plan සහ විනෝදාස්වාද අන්තර්ගතයන් රැසක් ඩයලොග් හඳුන්වාදෙනු ලැබීය.

ඒ පිළිබඳ වැඩි විස්තර, www.dialog.lk වෙබ් අඩවියෙන් දැනගත හැක.

එසේම, විදෙස්ගතවන ශ්‍රී ලාංකික පාරිභෝගිකයින්ටත්, මෙරටට එන සංචාරකයින්ටත්, තම 5G ස්මාර්ට්ෆෝන් හරහා ලොව පුරා ගමනාන්ත 76 කදී, අධිවේගී 5G අන්තර්ජාල පහසුකම් අත්විඳීමේ හැකියාව උදාකරමින්, ජාත්‍යන්තර රෝමිං සහකරුවන් 155 ක් හා අත්වැල් බැඳගත්, ශ්‍රී ලංකාවේ සිට පිරිනමන විශාලතම 5G රෝමිං ජාලයද ඩයලොග් සතු වේ.

ඒ හරහා දෙස් විදෙස් පාරිභෝගිකයින්ට, ජාත්‍යන්තර මට්ටමේ අසමසම සේවාවන් අත්විඳීමට හැකියාව සැලසීමේ පුරෝගාමී මෙහෙවර උදෙසා වන කැපවීම, ඩයලොග් තවදුරටත් තහවුරු කරයි.

ශ්‍රී ලංකාවට අනාගත තාක්ෂණය හඳුන්වාදීමේ පුරෝගාමියා ලෙස, ඩයලොග්, ශ්‍රී ලංකාවේ ඩිජිටල් පරිවර්තනය උදාකිරීමේ ජාතික මෙහෙවර ඉදිරියට ගෙන යාම උදෙසා මෙන්ම රටේ දිගුකාලීන සංවර්ධනයට දායක වීම පිණිසද අඛණ්ඩව කැපවෙයි.

ඒ සඳහා ජාත්‍යන්තර මට්ටමේ අසමසම සම්බන්ධතාවන් මෙලෙස පිරිනැමීම තුළින්, ශ්‍රී ලංකාවේ ජන ජිවිත සරුසාර කරමින්, ව්‍යාපාර සවිබල ගැන්වීමට ඩයලොග් නිරන්තරයෙන් ඇප කැපවී කටයුතු කරයි.