පාකිස්තාන ඉස්ලාමාබාද්හිදී ඊයේ (11) සිදු වූ මරාගෙන මැරෙන බෝම්බ ප්‍රහාරයේ වගකීම එරට තලේබාන් සංවිධානය භාරගෙන තිබේ.

ඔවුන් ප්‍රහාරයේ වගකීම භාරගනිමින් පවසා ඇත්තේ, ඉස්ලාම් - විරෝධී නීති අනුගමනය කරමින් තීන්දු ලබාදීමට මුල්වන විනිසුරුවන්, නීතිඥයන් සහ නිලධාරීන් සිය ප්‍රහාරයේ ඉලක්කය වූ බවය.

මෙම ප්‍රහාරයේ දී මරාගෙන මැරෙන බෝම්බකරු අධිකරණ සංකීර්ණය තුළට යාමට උත්සාහ කළ බවත්, එය අසාර්ථක වූ නිසා එහි පිටතදී පිපිරවීම සිදුකර ඇති බවත් මූලික විමර්ශනයේ දී අනාවරණය වී තිබේ.

බෝම්බකරු පිටත ප්‍රදේශයක සිට යතුරුපැදියකින් ඉස්ලාමාබාද් නුවරට පැමිණ ඇති අතර, බෝම්බය සඳහා බෝල් බෙයාරිං යෙදූ කිලෝග්‍රෑම් 5ක පමණ පුපුරණ ද්‍රව්‍ය යොදාගෙන ඇති බවත් හෙළි වී ඇත.

ඊයේ සිදු වූ මෙම ප්‍රහාරයෙන් පුද්ගලයින් 12 දෙනෙකු ජීවිතක්ෂයට පත්ව තවත් 27 දෙනෙකු තුවාල ලැබූ බව පාකිස්තාන අභ්‍යන්තර කටයුතු අමාත්‍යවරයා පැවසීය.

මෙම මරාගෙන මැරෙන ප්‍රහාරය එල්ල වද්දී ඉස්ලාමාබාද් නුවරදී අන්තර් පාර්ලිමේන්තු කථානායකවරුන්ගේ සංවාද සමුළුව පැවැත්වෙමින් තිබුණි.

එමෙන්ම ඉස්ලාමාබාද් නුවරට කිලෝමීටර 16.5ක් පමණ නුදුරින් රාවල්පිණ්ඩි නුවර පැවැති ශ්‍රී ලංකා-පාකිස්තාන පළමු එක්දින ක්‍රිකට් තරගය ආරම්භවීමටද මිනිත්තු කිහිපයකට පෙරය.

ප්‍රහාරයෙන් පසුව පාකිස්තාන ජනාධිපති මන්දිරය නිකුත්කළ නිවේදනයක සඳහන් වූයේ, විදේශීය සහාය සහ පහසුකම් ලබමින් ක්‍රියාත්මක වන ත්‍රස්තවාදී කණ්ඩායම්වලට එරෙහිව පාකිස්තාන ආරක්ෂක අංශ අඛණ්ඩව මෙහෙයුම් සිදුකරන බවය.