ආණමඩුව ප්‍රදේශයේ කාන්තාවක් රවටා නිධානයක් ලබාගැනීම සඳහා තැම්පත් කිරීමට යැයි පවසමින් ඇයගේ රුපියල් ලක්ෂ 22කට ආසන්න රන් ආභරණ සොරකම් කිරීමේ සිද්ධියක් සම්බන්ධයෙන් සැකපිට එකම පවුලේ මව, පියා හා දියණිය පල්ලම පොලීසිය විසින් අත්අඩංගුවට ගෙන ඇත.

මෙලෙස අත්අඩංගුවට ගෙන ඇත්තේ බිංගිරිය ඌරාපොත්ත ප්‍රදේශයෙ පදිංචි 67 හැවිරිදි සැමියා, 48 හැවිරිදි බිරිද හා ඔවුන්ගේ දියණිය යැයි කියන 22 හැවිරිදි තරුණියක්ය.

සිද්ධියට මුහුණ දුන් කාන්තාව වසර 10කට ආසන්න කාලයක් ඩුබායි රාජ්‍යයේ සේවය කර ඇති අතර ඇය දෙදරු මවක් වේ.

ඇයගේ පල්ලම, කම්මන්දළුව ප්‍රදේශයේ පිහිටි තවත් ඉඩමක කුලී පදනමට රැදී සිටි එකම පවුලේ සැමියා, බිරිද හා දියණිය එක්ව මෙම සොරකම සිදු කර ඇත.

එම සැකකරුවන් තමන්ගේ කම්මන්දළුව නිවසේ රැදී සිටින අතරතුර එම නිවසට ආරක්ෂාවක් කිරීම සඳහා යැයි පවසමින් අවස්ථා කිපයකදී මෙම කාන්තාවගෙන් ලක්ෂ 5කට ආසන්න මුදලක් ලබාගෙන තිබේ.

එම ආරක්ෂාව මෙම සොරකම කළ සැකකාර පවුලේ කාන්තාව විසින් සිදු කළ බවත්, ඒ පිළිබඳව ඇති වූ විශ්වාසය මත ඔවුන් ගැන සැකයක් නොතිබූ බව ඇය පොලීසියට පවසා තිබේ.

එලෙස විශ්වාසය දිනාගෙන ඇති සැකකාර පවුල, වංචාවට හසු වූ කාන්තාව පදිංචිව සිටි ආඩිගම වැටියගල්වල නිවසට පැමිණ එම ඉඩමේ නිධානයක් ඇති බවත්, එය ගොඩගැනීමට හැකි බවත් පවසා ඇත.

කෙසේ වෙතත් මුලදී එම යෝජනාවට කාන්තාව අකමැත්ත පලකර ඇති නමුත්, සැකකරුවන් දැඩි පරිශ්‍රමයක් දරා ඇයව නිධානය ලබා ගැනීමට කැමති කරවා ගෙන තිබේ.

එහිදී නිධානය ලබාගැනීමට පෙර මෙම කාන්තාවගේ රන් ආභරණ සියල්ල වළදැමිය යුතු බවත්, එය ඇය ඉදිරියේ සිදුකරන බවත් සැකකාර පවුලේ මව දැනුම් දී ඇත.

තම නිවසේ කුලි පදනමට සිටින නිසා මොවුන් පිළිබදව සැක නොසිතා අදාළ කාන්තාව ඩුබායි රැකියාව අතරතුරදී මිලදී ගත් පවුම් 9කට ආසන්න රන් මාලයක්, පෙන්ඩන් 2ක් හා රන් වළලු 2ක් සුදු රෙදි කැබැල්ලක ඔතා වළ දැමීමට ලබාදී තිබේ.

එසේ ලබා දුන් රන් ආභරණ මෙම කාන්තාව ඉදිරියෙදීම මෙම සැකකරුවන් වළදමා ඇත.

රන් ආභරණ වළ දැමීමෙන් පසු යාතිකා කරමින් සිටියදී සැකකාර කාන්තාව, නිවෙස් හිමි කාන්තාවට නිවසට ගොස් පිරිසිදු ජලයට කහ දියර සකස් කර රැගෙන එන ලෙස දන්වා පිටත් කර යවා තිබේ.

පසුව නිවෙස් හිමි කාන්තාව එය පිළියෙළ කර රැගෙන ඒමෙන් පසු එම ස්ථානය පුරා ඉසිමින් වතාවත් සිදු කර ඇත.

එහිදී මෙම ස්ථානයේ බහිරයකු සිටින බවත්, බහිරවයා යවන තුරු වළදැමු රන් ආභරණ ලබාගැනීම නොකරන ලෙසත් පවසමින් ඔවුන් ඉන් පිටව ගොස් තිබේ.

කෙසේ නමුත් මෙම වළ දැමූ රන් ආභරණ ගොඩගැනීමට නිවෙස් හිමි කාන්තාව, මෙම සැකකාර කාන්තාවට අවස්ථා කිහිපයකදීම දුරකථන ඇමතුම් ලබා දුන්න ද ඔවුන් සම්බන්ධ කරගැනීමට නොහැකි වී ඇත.

ඒ අනුව ඇති වූ සැකය මත ඊයේ එම ස්ථානය හාරා රන් ආභරණ ගොඩගැනීමට කටයුතු කළ නිවෙස් හිමි කාන්තාවට හමුවී ඇත්තේ තමන් ලබා දුන් රන් ආභරණ නොව, වෙනත් සුර හා තවත් කිහිපයක්ය.

එයින් පසු සිද්ධියට මුහුණ දුන් කාන්තාව පල්ලම පොලිසියට පැමිණලි කර ඇත.

එම සිද්ධිය සම්බන්ධයෙන් මෙම සැකකාර පවුලේ තිදෙනා පල්ලම පොලීසිය මගින් අත්අඩංගුවට ගෙන තිබේ.

අත්අඩංගුවට ගත් සැකකරුවන් අධිකරණයට ඉදිරිපත් කිරීමට නියමිතය.