මාරාන්තික නව කොරෝනා වෛරසයෙන් ලංකාව සුරක්ෂිත ද?
January 24, 2020 07:19 pm
මාරාන්තික නව කොරෝනා වෛරසය හේතුවෙන් චීනයේ සිදුවූ මරණ සංඛ්යාව 26 දක්වා ඉහළ ගොස් ඇත.
වෛරසයේ බලපෑම නිසා චීනයේ ප්රධාන නගර 10 ගමනාගමනය ඇතුලු කටයුතු සීමා කිරීමෙන් කෝටි දෙකක පමණ පිරිසක් අපහසුතාවට පත්ව සිටින බවයි වාර්තා වන්නේ.
මේ වන විට තවත් රටවල් හතකට වෛරසය ව්යාප්තව ඇති අතර ශ්රී ලංකා රජය පවසන්නේ ඕනෑම අවදානම් තත්වයකට මුහුණ දීම සඳහා සූදානමින් සිටින බවයි.
මේ වන විට සමස්ත ලෝකයේම අවධානය යොමු වී ඇති මාරාන්තික කොරෝනා වෛරසය මුල් වරට වාර්තා වූයේ චීනයේ හූබෙ ප්රාන්තයේ වූහාන් නගරයෙන්.
ඒ පසුගිය දෙසැම්බර් මාසයේදී.
පෙනහළු බරපතළ ලෙස රෝගී කරන මෙම වෛරසය ආසාදනය වී එම ප්රාන්තයේ 24 දෙනෙකු මේ වනවිට මියගොස් ඇති අතර තවත් මරණ දෙකක් පිට පළාත්වලින් වාර්තා වෙයි.
මීට නිශ්චිත ප්රතිකාරයක් තවමත් සොයාගෙන නොමැති අතර වවුලන්ගෙන් සහ නාගයා ඇතුළු සර්පයන්ගෙන් මෙය පැතිරී ඇති බවටයි දැනට එරට සෞඛ්ය බලධාරීන් සැක පළ කරන්නේ.
වවුලන්ගේ මාංශ භාවිත කර සාදන එරට ජනතාව අතර ප්රචලිත සුප් සහ සර්ප මාංශ අනුභවය නිසා මෙම වෛරසය පැතිර යන බවටත් සැක කෙරෙයි.
වෛරසයේ දැඩි බලපෑමට ලක් වූ හූබෙයි ප්රාන්තයේ වූහාන් නගරය ඇතුළු චොන්චින්ග්,ග්වැන්ෂු ටියැන්ජින් ඇතුළු නගර දහයක ගමනාගමනය ඇතුළු ක්රියාකාරකම් මේ වන විට අත්හිටුවා ඇත.
එරට 800 දෙනෙකුට වැඩි ප්රමාණයක් මේ වන විට අසාදිතයින් ලෙස හඳුනාගෙන ඇති බවයි වාර්තා වන්නේ.
විදෙස් වාර්තා පෙන්වා දෙන්නේ වියට්නාමය,සිංගප්පූරුව,තායිලන්තය,තායිවානය,දකුණු කොරියාව,ජපානය සහ අමෙරිකාව යන රටවලින් කොරෝනා ආසාදිතයින් හඳුනාගෙන ඇති බවයි.
රටවල් රැසක් ස්වදේශිකයන්ට දැනුම් දී ඇත්තේ චීනයේ සංචාර සීමා කරන ලෙසටයි.
මේ අතර වූහාන් නගරයේ සිටින ශ්රී ලාංකිකයින් පිළිබඳ නිරන්තර අවධානයෙන් පසුවන බව විදේශ කටයුතු අමාත්යාංශය සහ චීනයේ ශ්රී ලංකා තානාපති කාර්යාලය පවසයි.
ශ්රී ලාංකික සිසුන් 30 දෙනෙකු පමණ එම නගරයේ අධ්යාපන කටයුතුවල නිරතවන බවයි එම අමාත්යාංශය පෙන්වා දෙන්නේ.
එමෙන්ම කොරෝනා වෛරසය පිළිබඳ දැඩි අවධානයෙන් පසුවන බවයි මෙරට සෞඛ්ය අංශ පවසයි.
එම වෛරසය පිළිබඳ වාර්තා වීමෙන් පසු මෙරටට පැමිණෙන ගුවන් මගීන් අතරින් රෝග සහිත පුද්ගලයින් හඳුනාගැනීම සඳහා කටුනායක බණ්ඩාරනායක ජාත්යන්තතර ගුවන් තොටුපළේ විශේෂිත ස්කෑනර් යන්ත්ර තුනක් ද ස්ථාපිත කෙරුණි.
මිනිස් සිරුරේ උෂ්ණත්වයට සංවේදී එම යන්ත්ර හරහා උෂ්ණත්වය වැඩි පුද්ගලයින් සොයා ගැනෙන අතර ඔවුන් පරික්ෂණ සඳහා යොමු කෙරෙයි.
එමෙන්ම ශ්රී ලංකන් ගුවන් සමාගමද අද මේ පිළිබඳ නිවේදනයක් නිකුත් කළේය.
ඉන් සඳහන් කර ඇත්තේ කොරෝනා වසංගතයේ අවදානම අඩු කරගැනීම සඳහා පූර්ව ආරක්ෂණ ක්රමවේද රැසක් අනුගමනය කරමින් සිටිව බවයි.
ගුවන් ගමන් අතරතුරදී මෙවන් තත්වයක් වාර්තා වුවහොත් ක්රියාකළ යුතු ආකාරය පිළිබඳ ගුවන් කාර්ය මණ්ඩලය දැනුවත් කර ඇති බව ද ශ්රී ලංකන් ගුවන් සමාගම පෙන්වා දෙයි.
මේ සම්බන්ධයෙන් අද රජයේ වෛද්ය නිලධාරීන්ගේ සංගමයේ මාධ්ය හමුවේදී සහ පාර්ලිමේන්තුවේදී ද අදහස් පළ වුණි.
සෞඛ්ය අමාත්ය පවිත්රා වන්නිආරච්චි මහත්මිය පාර්ලිමේන්තුවේ දී ප්රකාශ කර සිටියේ රජයක් ලෙස මේ පිළිබඳ ගත හැකි සියලු ක්රියාමාර්ග ගෙන ඇති බවයි.
රජයේ වෛද්ය නිලධාරීන්ගේ සංගමයේ මාධ්ය ප්රකාශක සමන්ත ආනන්ද මහතා ප්රකාශ කළේ දැනට මෙම රෝගය පිළිබඳ අවදානමක් ලංකාව තුළ ඇති වී නැති බවයි.