පොලීසිය විසින් තම මිතුරාට වෙඩි තැබූ බවත් අනතුරුව කවුරු හරි ඇසුවොත් “ උඹලා පැනලා යන්න“ හැදුව නිසා මෙසේ වුණා යැයි පවසන ලෙස පොලිස් රාළහාමිලා කියා සිටි බවත් නිට්ටඹුව, පස්යාල ප්‍රදේශයේ ඊයේ රාත්‍රී සිදුවූ වෙඩි තැබීමෙන් මියගිය තරුණයාගේ මිතුරා පවසයි.

(වීඩියෝ)

මෙම සිද්ධිය ගැන මාධ්‍ය වෙත අදහස් දක්වමින් ඔහු කියා සිටියේ පොලීසිය යතුරුපැදිය නතර කරන්නැයි අණ දුන් පසු නතර කළ බවයි.

අනතුරුව ඔවුන් තම මිතුරාට (සුබාෂ් ඉන්දික ජයසිංහ අවුරුදු 23) වෙඩි තැබූ බවද හෙතෙම පැවසීය.

එම අවස්ථාවේ පොලීසියේ නිලධාරීන් පස් දෙනෙකු පමණ සිටි බවත් ඔවුන් බීමතින් සිටි බවත් එම තරුණයා කියා සිටියේය.

මෙම සිද්ධිය ගැන අදහස් දක්වමින් මිය ගිය තරුණයාගේ පියා පැවසුවේ යතුරුපැදිය අණ නොතකා ධාවනය කළ නිසා වෙඩි තැබුවා යැයි පොලීසිය කියන්න උත්සාහ කරන බවයි.

එය සම්පූර්ණයෙන් ප්‍රතික්ෂේප කරන බවත් තම පුතාගේ මිතුරා ‍ඊයේ රාත්‍රියේ සිදුවූ එම සත්‍ය කතාව දන්නා බවත් පැවසීය.

තම පුතාට වෙඩි තබා ඇතැයි පොලීසියට පැමිණිලි කරන්න ගිය විට පොලීසියේ නිලධාරියෙක් කොහේද වෙඩි තබා ඇත්තේ යැයි කියමින් පැමිණිල්ලක් කිරීම අනවශ්‍ය බවද කියා සිටියේ යැයි එම තරුණයාගේ පියා පැවසුවේය.

මෙම සිද්ධිය සම්බන්ධයෙන් එම අවස්ථාවේ යතුරුපැදියේ සිටි තරුණයා ද තුවාල ලබා රෝහල්ගතව සිටින අතර මේ ගැන ඔහු මෙන්ම මිය ගිය තරුණයාගේ පියාද මාධ්‍ය වෙත දැක්වූ අදහස් පහත පරිදි වේ.



වෙඩි ප්‍රහාරයෙන් මිය ගිය තරුණයා සමග සිටි අනෙක් තරුණයා (සචීන් චතුරංග අවුරුදු 18) ඊයේ රාත්‍රියේ ඔවුන් මුහුණ දුන් සිද්ධිය විස්තර කළේ මෙසේය.



“අපි සල්ලි එක්කහුකරගෙන ආවා. අපි එනකුට ට්‍රැෆික් හිටියා. ඊට පස්සේ බයිසිකලය නැවැත්තුවා. පිටිපස්සෙන් ඇවිල්ලා වෙඩි තිබ්බා. වෙඩි තියලා ලේ ආවා. මම කෑගැහුවා වෙඩි තිබ්බා කියලා මම කෑ ගැහුවා. අනේ අනේ කියලා කෑගහද්දී කවුරුත් ආවේ නෑ.

මම ඊට පස්සේ වාහනයකට අත දැම්මා. වාහනයකට අත දැම්මාම දහදෙනෙක් විතර ආවා. ඊට පස්සේ ඒකට්ටිය ගියා යන්න ආවේ නෑ පැත්ත පළාතක.

පොලීසියේ පස්දෙනෙක් හිටියා. බීලා හිටියේ හොඳටම. මට ගැහුවා කනේ පහරවල් දෙකක්. කනේ පහරවල් ගහලා කිව්වා මූ දාලා පලතෝ කියලා.

‍ උන් බීලා හිටියේ හොඳටම. පොලිස් රාළහාමිලා කිව්වා උඹ කියපන් උඹලා කට්ටිය ඇහුවොත් එහෙම, උඹලා පැනලා යන්න හැදුවා කියලා. උඹ කියපන් ඒ විදියට. මම කිව්වා ඒ එහෙම කියන්න බෑනේ කියලා”.



මිය ගිය තරුණයාගේ පියා ( සුනිල් ජයසිංහ) තම පුතා අහිමිවීම නිසා ඇති වූ වේදනාව කියා සිටියේ මෙසේය.



“අවුරුදු 24 ක් දුක් විඳලා දෙමව්පියෝ තමන්ගේ දරු පැටියෙක් හදාගන්නේ. බොහෝම කැතයි. ඇත්තටම‍ පොලිස් දෙපාර්තමේන්තුව කියන්නේ ඔය වගේ තත්ත්වයක ඉන්න මිනිස්සු නෙවෙයි. අවංකවම රාජකාරීය වැදගත් විදියට කරන්න ඕන කට්ටියක්.

නමුත් ඒ වුණාට මගේ පුතා අමානුෂික විදියට ඊයේ වෙඩි තියලා මරපු එක, මට මාර වේදනාවක් තියෙන්නේ අවංකවම. අනික පොලීසියෙන් දැන් කියන්න හදනවාලු අණ නොතකා යෑම කියලා.

පොලීසියේ බයිසිකලේ, සීරිලාවත් නෑ. පුතාගේ ඇගේ හම කෑල්ලක්වත් කැඩිලා නෑ. බයිසිකලයක් නවත්වන්නේ නැතිව යනකුට වෙඩි තිබ්බොත් බයිසිකලේ වෙඩි කාගෙන ගිහින් නවතිනවා.දෙන්නෙක් හිටියා එක්කෙනා දැන් හොස්පිටල් එකේ ඉන්නවා එයා සම්පූර්ණ විස්තරේ සත්‍ය කතාව කියනවා.

මේ වගේ තව තාත්තා කෙනෙකුටවත්, අම්මා කෙනෙකුටවත්, ‍මේ වගේ දුකක් නොවෙන්න උසස් පොලිස් නිලධාරී මහත්තුරු මම බලාපොරොත්තු වෙනවා මට සාධාරණයක් කරයි කියලා.

මගේ නොනා මැරෙයි යකෝ මිනිය දැක්කාම මගේ රත්තරන් පුතාගේ. හෙණ ගහන්න එපැයි මුන් කරපු අපරාදේ. අනේ හාමුදුරුවනේ වැහි නැති හෙණ ගහන්ට ඕන මුන්ට මගේ රත්තරන් පුතාට වෙඩි තියලා මරපු එකට. මුන්ට හෙණම ගහපන් දෙයි හාමුදුරුවනේ. කොහේවත් නැති කුඩු කාරයෝ, ගංජා කාරයෝ පොලීසියට අරන් පිස්තෝල දෙනවා. ජීවිතෙට දැකලාවත් නෑ.

මම නිට්ටඹුව පොලීසියට ගියාට පස්සේ එතැන හිටියා මහත්තුරු තුන් හතර දෙනෙක්. මම කිව්වා මගේ පුතාට වෙඩි තියලා පැමිණිල්ලක් දාන්න අවේ කියලා. එතකුට රිසව් එකේ හිටියේ මහත්තයා අහනවා කොහෙද කියලා ම‍‍ෙගන්. මට නොම්බරය ලියා ගන්න බැරුව ගියා.

නිට්ටඹුව පොලීසියේ පාන්දර 4ට හිටපු රිසව් එකේ සාජන් මහත්තයා මගෙන් අහනවා කොහේද කියලා වෙඩි තියලා තියෙන්නේ. එතකොට එයාලා දන්නෑ බබාලා. සම්පූර්ණ බොරුවක් කළේ. ඊට පස්සේ ලොකු නිලධාරීන්ට කතා කරලා කිව්වා මහේස්ත්‍රාත්තුමා ඇවිල්ලා හෙට උදේට කට උත්තර ගන්නවා වැඩේ ඔක්කොම එතැනදී කර ගත්තෑකි. පැමිණිල්ලක් දාන්න ඕන නෑ යන්න කියලා.

ඊට පස්සේ මම ගියා කොටදෙණියාව පොලීසියට. ගිහිල්ලා පොලිස් ස්ථානාධිපතිතුමා හම්බවුණා. හම්බවුණාම පැමිණිල්ලක් දාන්න කතන්දර මොකුත් ඕන නෑ. හෙට උදේට පශ්චාත් මරණ පරීක්ෂණය ද මොකක්ද කරනවා. කරපුවාම මහේස්ත්‍රාත්තුමා ඉන්න තැන ඔයා ඔය විස්තර ටික කියන්න, ඉතින් මට ඊට පස්සේ කර කියා ගන්න දෙයක් නෑනේ”.



කෙසේ වෙතත් මෙම සිද්ධිය ගැන අදහස් දක්වමින් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි අජිත් රෝහණ මහතා සඳහන් කළේ පොලිස් අණ නොතකා ධාවනය කරද්දී ඊයේ රත්‍රී 11.30ට පමණ මෙම වෙඩි තැබීම සිදුව ඇති බවයි.

පස්යාල ප්‍රදේශයේ රාජකාරියේ යෙදී සිටි රථවාහන නිළධාරින් විසින් අදාළ යතුරුපැදිය නතර කරන ලෙස දැනුම්දුන්නද, එය නොනවත්වා ධාවනය කර පොලිස් නිළධාරීන්ට අනතුරක් සිදුකිරීමට උත්සාහ කර ඇති බව අජිත් රෝහණ මහතා පැවසුවේය.

එහිදී පොලිස් නිලධාරීන් විසින් යතුරුපැදිකරුට වෙඩි තබා ඇති බවත් මේ නිසා 23 හැවිරිදි තරුණයෙකු මියගොස් ඇති බවත් හෙතෙම කීවේය.

මළ සිරුර වතුපිටිවල රෝහලේ තබා ඇති බවත් නිට්ටඹුව පොලීසිය මේ සම්බන්ධයෙන් වැඩිදුර පරීක්ෂණ පවත්වන බවත් ඔහු පැවසීය.

මේ සම්බන්ධයෙන් කොළඹදී අද (12) පස්වරුවේ මාධ්‍ය හමුවක් පවත්වමින් පොලිස් මාධ්‍ය ප්‍රකාශකවරයා කියා සිටියේ මෙම සිද්ධිය ගැන ගම්පහ පොලිස් අධිකාරිවරයාගේ ප්‍රධානත්වයෙන් ස්වාධීන පරීක්ෂණයක් පවත්වන බවයි.

පොලිස් නිලධාරීන් එම අවස්ථාවේ බීමතින් සිට ඇති බවට එල්ල වන චෝදනා ප්‍රතික්ෂේප කරන බවත් ඔවුන් රාජකාරීයේ නිරතව ඇති බවත් හෙතෙම කියා සිටියේය.

එසේම අදාළ තරුණයාගේ පියා පොලීසියට පැමිණිලි කිරීමට පැමිණි අවස්ථාවේදී එය නොසලකා හැර ඇති බවට එල්ල වන චෝදනාව ද මෙම පරීක්ෂණය සඳහා සාක්ෂියක් ලෙස බාරගන්නා බවද අජිත් රෝහණ මහතා පැවසීය.

මේ අතර අණ නොතකා ධාවනය වූ යතුරු පැදිකරුට වෙඩි තැබීමේදී වෙඩි උණ්ඩ යතුරු පැදිකරුගේ ශරීරයේ පිටුපස නොවැදී ඉදිරිපස වැදී ඇත්තේ කෙසේදැයි මාධ්‍යවේදියෙකු ඇසූවිට හෙතෙම කියා සිටියේ මේ ගැන පශ්චාත් මරණ පරීක්ෂණයේදී කරුණු අනාවරණය කර ගත හැකි බැවින් ඒ පිළිබඳව ප්‍රකාශයක් කළ නොහැකි බවයි.