ලක්විජය බලාගාරයේ යන්ත්රවලට හානියක් සිදුව නොමැති බව කෝප් කමිටුව කියයි
March 12, 2026 03:50 pm
මෑත කාලීනව මෙරටට ආනයනය කරන ලද ගල්අඟුරු භාවිතයෙන් නොරොච්චෝලේ ලක්විජය බලාගාරයේ අදාළ යන්ත්රෝපකරණවලට කිසිදු හානියක් සිදුවී නොමැති බව පාර්ලිමේන්තුවේ පොදු ව්යාපාර පිළිබඳ කාරක සභාවේ සභාපති වෛද්ය නිශාන්ත සමරවීර මහතා පවසයි.
සභාපතිවරයා මේ බව ප්රකාශ කළේ, පසුගිය හයවෙනිදා නොරොච්චෝලේ ලක්විජය බලාගාරයේ ස්ථානීය පරීක්ෂාවකට එක්වූ අවස්ථාවේදීය.
බලාගාරය නිසි පරිදි ක්රියාත්මක වන බවත්, විදුලිය ජනනය කිරීමේ යම් අඩුවක් පැවතුණද, එය මේ අවස්ථාවේ රටෙහි බලශක්ති අවශ්යතාවය අනුව ගැටළුවක් නොවන බවත් ඔහු සඳහන් කළේය.
ඉදිරියේදී අවශ්ය වන ගල්අඟුරු ප්රමාණය බලාගාරය සතුව ඇති නිසා මේ සම්බන්ධයෙන් පරීක්ෂණයක් සිදු වන තෙක් ප්රචාරවලට නොරැවටෙන ලෙස ජනතාවගෙන් ඔහු ඉල්ලා සිටියේය.
මෙම ස්ථානීය පරීක්ෂාවේදී ගල්අඟුරු ගොඩබෑමේ සිට ගල් අඟුරු මගින් විදුලිය ජනනය කරන තෙක් වන ක්රියාවලියට අදාළ සියලුම කටයුතු පරීක්ෂාවට ලක්කරන ලදී.
ගල් අඟුරු ගොඩබෑම, ගබඩා කර තැබීම, අහඹු නියැදි සාම්පල ලබා ගැනීම, නියැදි පරීක්ෂණය හා ප්රධාන පාලක මැදිරියේ මෙහෙයුම් කටයුතු ආදී කාර්යයන් පිළිබඳව කාරක සභාව සිය අවධානය යොමු කළේය.
මෙරටට ආනයනය කරන ගල්අඟුරුවල තත්ත්වය පරීක්ෂා කිරීම ප්රතීතනය සහිත රට තුළම ස්ථාපිත ස්වාධීන පරීක්ෂණාගාරයක් මගින් සිදු කිරීම විදුලි ජනනය සඳහා ගල් අඟුරු ආනයනයේදී වැදගත් වන බව පොදු ව්යාපාර පිළිබඳ කාරක සභාව සිය නිරීක්ෂණය මගින් අනාවරණය කළේය.
රටෙහි පවතින විදුලි අවශ්යතාවය සම්පූර්ණ කිරීම සඳහා කල්පිටිය අර්ධද්වීපයෙහි නාරක්කල්ලිය පිහිටි නොරෝච්චෝලේ ලක්විජය බලාගාරය ඉදිකර තිබේ.
මෙරට විශාලම සහ එකම ගල්අඟුරු බලාගාරය ලෙස ජාතික විදුලි පද්ධතිය සඳහා 900MWකට අධික දළ ධාරිතාවක විදුලිය නිකුත් කරනු ලබයි.
රටෙහි විද්යුත් ශක්ති අවශ්යතාවයෙන් 35% - 40% පමණ මෙම බලාගාරය විසින් නිපදවනු ඇත.
විදුලිබල මණ්ඩලයට අනුයුක්ත 845 දෙනෙකුගෙන් පමණ සමන්විත වන කාර්ය මණ්ඩලයකින් බලාගාරය සමන්විත වන බවත්, ලක්විජය බලාගාරයේ කළමනාකරු ඇතුළු නිලධාරීන් සමග පැවති සාකච්ඡාවේදී අනාවරණය විය.
නොරොච්චෝලේ ලක්විජය බලාගාරය ශ්රී ලංකාවේ ඇති විශාලතම විදුලි බලාගාරය මෙන්ම, එකම ගල් අඟුරු බලාගාරය වන අතර එය මෙරටෙහි විද්යුත් ශක්ති අවශ්යතාවයෙන් 35% - 40% පමණ නිපදවනු ලබයි.
ගල්අඟුරු ගොඩබෑමෙන් අනතුරුව ගබඩා කර තැබීම සඳහා අක්කර 47කින් යුක්ත අංගනයක් බලාගාරය සතුව පවතී.
එහි නියැදි පරීක්ෂාවට අවශ්ය විද්යාගාර පහසුකම් හා විදුලි ජනනය සම්බන්ධයෙන් තත්ය දත්ත පරීක්ෂා කිරීමට අවශ්ය යන්ත්රෝපකරණ ඇතුළු පහසුකම් බලාගාරය සතුව පවතින බව එහිදී අනාවරණ විය.
ආනයනය කරන ගල්අඟුරුවල තත්ත්වය පරීක්ෂා කිරීමේ ක්රියාවලියේ ගැටලු සහගත අවස්ථා පැවතීම හේතුවෙන් එම ක්රියාවලිය වැඩි දියුණු කරගැනීම සුදුසු බව කමිටුවේ අදහස විය.
ප්රතීතනය සහිත රට තුළම ඇති ස්වාධීන පරීක්ෂණාගාරයකින් මෙම පරීක්ෂණ කටයුතු කිරීමේ වැදගත්කම කමිටුව එහිදී පෙන්වා දුන්නේය.
