පත්වී පැය 72ක් ගතවුවත් තවමත් ප්රසිද්ධියට නොපැමිණි මොජ්තබා - තුවාල වෙලාද ? සැඟවිලා ද ?
March 12, 2026 01:28 pm
ඉරානයේ නව උත්තරීතර නායකයා ලෙස අයතුල්ලා මොජ්තබා කමේනි නම් කර පැය 72ක කාලයක් ගතවී ඇතත්, ඔහු මෙතෙක් ප්රසිද්ධියේ පෙනී නොසිටීම ලොව පුරා දැඩි කුතුහලයක් ඇති කර තිබේ.
ඔහු ඉරාන ජාතිය අමතා ප්රකාශයක් හෝ අවම වශයෙන් ලිඛිත ප්රකාශයක්වත් මෙතෙක් නිකුත් කර තොතිබීම එම කුතුහලය තව තවත් තීව්ර කරයි.
ඉරාන රාජ්ය රූපවාහිනිය විසින්, 56 හැවිරිදි මොජ්තබා කමේනි හඳුන්වා දෙන්නේ ජාන්බාස් 'Jaanbaz' හෙවත් සතුරා අතින් තුවාල ලැබූ යුද වීරයෙකු ලෙසය.
අමෙරිකාව සහ ඊශ්රායලය එක්ව ඉරානයට එල්ල කරන ප්රහාරයන් ඉරාන රජය හඳුන්වන්නේ 'රාමසාන් යුද්ධය' යනුවෙනි.
ඔහු මෙම ප්රහාරවලින් තුවාල ලබා ඇති බවට අනුමාන කෙරෙන අතර, ඔහු ප්රසිද්ධියේ පෙනී නොසිටීමට එය හේතුවක් විය හැකි බව වාර්තා වේ.
කෙසේ වෙතත්, ඉරාන ජනාධිපතිවරයාගේ පුත් යූසුෆ් පෙසෙෂ්කියන් සමාජ මාධ්ය ඔස්සේ පණිවුඩයක් නිකුත් කරමින් කියා සිටියේ, මොජ්තබා කමේනි "සෞඛ්ය සම්පන්නව සහ ආරක්ෂිතව" පසුවන බවය.
මොජ්තබාගේ පියා වන අලි කමෙනි ඝාතනය වීමෙන් පසුව, නව නායකයාගේ ආරක්ෂාව සඳහා ඉරානයේ ප්රභූ මර්දන ඒකකයක් වන Black-clad Counterterrorism Special Force යොදවා ඇති බව වාර්තා වේ.
මොහු සිය පියාගේ දැඩි මතධාරී ප්රතිපත්ති එලෙසම ඉදිරියට ගෙන යනු ඇතැයි විශ්වාස කෙරේ.
පසුගිය පෙබරවාරි 28 වෙනිදා එල්ල වූ ප්රහාරවලින් තම පියා, මව සහ බිරිඳ අහිමි වූ මොජ්තබා කමේනි, අමෙරිකාවට සහ ඊශ්රායලයට එරෙහිව දැඩි ප්රතිපත්තියක් අනුගමනය කරමින් සිය පවුලේ සාමාජිකයන්ගේ මරණවලට පළිගැනීමට උත්සාහ කරනු ඇති බවට දේශපාලන විශ්ලේෂකයෝ මත පළ කරති.
නව නායකයාගේ සැබෑ තත්ත්වය හෝ ඔහු සිටින ස්ථානය පිළිබඳව මෙතෙක් නිල තොරතුරක් අනාවරණය වී නොමැති වීම නිසා ඉරානයේ මෙන්ම ජාත්යන්තරයේ ද මේ පිළිබඳව විවිධ කතාබහ නිර්මාණය වී තිබේ.
