පාස්පෝට් අවශ්‍ය අයගෙන් ඇමති විජිත කළ ඉල්ලීම
October 29, 2024 12:03 pm
විදෙස් ගමන් බලපත්‍ර ලබා ගැනීම සඳහා අත්‍යවශ්‍ය ම අය පමණක් ආගමන විගමන දෙපාර්තමේන්තුවට පැමිණෙන ලෙස කැබිනට් ප්‍රකාශක විජිත හේරත් මහතා ඉල්ලා සිටියි.
ඔහු පැවසුවේ නව පාස්පෝට් තවත් ලැබීමට නියමිත බවත් එම තොග ලැබුණු පසු එම ගැටලුව විසඳෙන බවත්ය.
පසුගිය දින වල බත්තරමුල්ල ආගමන විගමන කාර්යාලය අසලට පාස්පෝට් ලබාගැනීම සඳහා විශාල වශයෙන් පිරිස් පැමිණීම හේතුවෙන් උණුසුම් තත්ත්වයක් ඇතිවුණි.
"ප්‍රමුඛතාවය එක එක්කෙනා අනුව වෙනස් වෙනවා. ඇත්තටම ඒක නිර්ණය කරන්න වෙන්නේ ඇත්තටම මානුෂීය හේතු සහ එය දිහා බලලා. 10,000ක් එන්නේ නෑ. නමුත් 2,000ක් විතර දවසකට ඇවිල්ලා ඉන්නවා. අපි ඒ අයට ක්‍රමවේදයක් හදලා තියෙනවා. ඔන්ලයින් ක්‍රමවේදය අසාර්ථක වෙලා තියෙනවා. මොකද ඒකේ ව්‍යාජ ක්‍රම භාවිත කරලා තියෙනවා. සිම් කාඩ් දෙක තුන භාවිත කරලා සමහර ඒජන්සි තියෙනවා ඔවුන් මැදිහත් වෙලා මේක මැනිපියුලේට් කරලා තියෙනවා. ඒ ගැටලුව නිසා තමයි ඒක වෙනස් කරලා තියෙන්නේ. දැනට යම් ක්‍රමවේදයක් හදලා තියෙනවා. ඒ ක්‍රමවේදයේ අපහසුතාවයට පත්වෙන එකක් තියෙනවා. ඒ නිසා තමයි අපි කියන්නේ යම් සීමා සහිත ප්‍රමාණයක් අපි ටෝකන් දෙනවා. ඒ නිසා අර දිගුකාලීනව ගමන් යන්න ඉන්න අය - අපිට කියන්න බෑ එන්න එපා කියලා - ඉල්ලීමක් කරනවා ඒ අය කලබල වෙන්න එපා තව විශාල පාස්පෝට් ප්‍රමාණයක් ලංකාවට එනවා ඒ මුද්‍රණ කටයුතු අවසන් වුණහම එතකොට මේ කිසි ගැටළුවක් නැතිව ගන්න පුළුවන්. ඒ නිසා අත්‍යවශ්‍ය අවශ්‍යතා තියෙන අය පමණක් මේක ලබාගන්න කියන ඉල්ලීම අපි ජනතාවගෙන් කරනවා."
විදේශ ගමන් බලපත්‍ර ලබාගැනීමේ අපේක්ෂාවෙන් අදත් (29) බත්තරමුල්ල ආගමන විගමන දෙපාර්තමේන්තුව ඉදිරිපිටට විශාල ජනතාවක් පැමිණ සිටියහ.
ඒ අසල මාර්ගයේ පෝළිම්වල රැඳී සිටින තමන්ට අවශ්‍ය අවම සනීපාරක්ෂක පහසුකම් හෝ නොමැතිවීම හේතුවෙන් දැඩි අපහසුතාවයකට පත්ව සිටින බව ජනතාව පෙන්වා දුනි.
පසුගිය ආණ්ඩුව සමයේ ඇති වූ මෙම අර්බුදයට පිළියම් ලෙස එවක රජය ඇණවුම් කර තිබූ නව විදෙස් ගමන් බලපත්‍ර 750,000 කඩිනමින් ගෙන්වා බෙදාහැරීමට වත්මන් ආණ්ඩුව පියවර ගත්තේය.
එම විදෙස් ගමන් බලපත් නිකුත් කිරීම ඔක්තෝබර් 23 වනදා ආරම්භ කළේය.
එහෙත් විදේශ ගමන් බලපත්‍ර ලබාගැනීමට අති විශාල පිරිසක් පැමිණ සිටීම නිසා ඊයේ මෙන්ම අද දිනයේත් බත්තරමුල්ල ආගමන විගමන දෙපාර්තමේන්තුව ඉදිරිපිට දිගු පෝලිම් දක්නටය ලැබුණි.
