ඔස්ට්‍රේලියානු නායකගෙන් විස්සයි විස්ස නව වාර්තාවක්
July 3, 2018 03:27 pm
විස්සයි විස්ස ජාත්‍යන්තර ක්‍රිකට් තරඟයකදී ක්‍රීඩකයෙකු විසින් ලැබූ ඉහළම ලකුණු සංඛ්‍යාව වාර්තා කිරීමට ඔස්ට්‍රේලියානු කණ්ඩායමේ නායක ආරෝන් ෆින්ච් මීට ටික වේලාවකට පෙර සමත් වුණි.
ඒ සිම්බාබ්වේ කණ්ඩායම සමග හරාරේ ක්‍රීඩාංගණයේ පැවැත්වෙන විස්සයි විස්ස ක්‍රිකට් තරඟයේ දී පන්දු 76 ක් තුළ ලකුණු 172 ක් වාර්තා කරමින්ය.
අරෝන් ෆින්ච්ගේ ඉනිමට හයේ පහර 10 ක් සහ හතරේ පහර 16 ක් ඇතුළත් වුණි.
මීට පෙර ද විස්සයි විස්ස ජාත්‍යන්තර ක්‍රිකට් තරඟයකදී ඉහළම පෞද්ගලික ලකුණු සංඛ්‍යාවක් වාර්තා කල ක්‍රීඩකයා බවට පත්ව තිබුණේ ද ඔහු වීම විශේෂත්වයක්ය.
2013 වසරේ එංගලන්ත කණ්ඩායමට එරෙහිව පැවති විස්සයි විස්ස තරගයකදී පන්දු 63 ක් තුළ ලකුණු 156 ක් ලබා ගනිමින් ඔහු එම වාර්තාව තබා තිබුණි.
සිම්බාබ්වේ කණ්ඩායම සමඟ පැවැත්වෙන විස්සයි විස්ස තරඟයේදී ඔස්ට්‍රේලියානු කණ්ඩායම නියමිත පන්දුවාර 20 තුළ කඩුලු 02 ක් පමණක් දැවී ලකුණු 229 ක් ලබා ගත් අතර මේ වන විට සිම්බාබ්වේ කණ්ඩායම පිළිතුරු ඉනිමට පහරදෙමින් සිටියි.
