හම්බන්තොට වරාය චීන සමාගමකට අනූ නව අවුරුදු බදු පදනමක් මත ලබාදීමේ යෝජනාව කැබිනට් මණ්ඩලයට ඉදිරිපත් වුණා. ඊට විෂය භාර අමාත්‍ය අර්ජුන රණතුංග විරුද්ධ වීමත් සමග කැබිනට් රැස්වීම උණුසුම් මුහුණුවරක් ගත්තා.

´´හම්බන්තොට විශාල ණය බරක් බව පිළිගන්නවා. නමුත් මේක සංවර්ධන කිරීම සිදුවිය යුත්තේ ශ්‍රී ලංකා වරාය අධිකාරියටත්, රටටත් අවාසියක් නොවන විදිහටයි. චීන සමාගමට 80%ක් දෙනවට මට නම් එකඟ වෙන්න බෑ. අඩුම තරමින් චීනයට 65%කට වඩා නොදිය යුතුයි´´

අර්ජුනගේ විරෝධය නොතකා ආණ්ඩුවේ ඇමතිවරු කරුණු ඉදිරිපත් කළා.

´´චීන සමාගම 80%ක් ඕනෙ කියන ස්ථාවරයේ ඉන්නවා. 20%යි ශ්‍රී ලංකාවට ලැබෙන්නේ. අනික මේ ගිවිසුමට ශ්‍රී ලංකා වරාය අධිකාරියට අත්සන් කිරීමට බලයක් නැති බව නීතිපතිවරයා දන්වලා තියනවා.´´

´´එහෙනම් මේ ගිවිසුමට මුදල්, වරාය හා ජාත්‍යන්තර වෙළඳ අමාත්‍යාංශවල ලේකම්වරුන්ට අත්සන් කරන්න කියමු´´ ආණ්ඩුවේ ඇමතිවරයෙක් යෝජනා කළා.

´´එතකොට මේ සේවකයින් සියලු දෙනාම චීන සමාගමට බඳවාගත යුතුයි. ඒකටවත් එකඟද?´´

අර්ජුන මතුකළ ඒ ප්‍රශ්නයට පැහැදිලි උත්තරයක් කිසිවෙකුත් ලබාදුන්නේ නැහැ.

හම්බන්තොට ඉදිකිරීමට ගත් ණය මුදල ක්‍රමානුකූලව ගෙවීමේ වගකීම මෙහිදී මුදල් අමාත්‍යාංශය භාරගත්තා.