Back to Top

සාම පිපාසයෙන් සිටි කොලොම්බියා ජනපති නොබෙල් ත්‍යාගය දන් දෙයි

October 13, 2016  



2016 සාමය සඳහා වන නොබෙල් ත්‍යාගයෙන්  පිදුම් ලැබූ කොලොම්බියානු ජනාධිපති හුවාන් මැනුවෙල් සාන්ටොස්, තමන්ට ලද ත්‍යාග මුදල පරිත්‍යාග කිරීමට තීරණය කර තිබෙනවා.

ජනාධිපතිවරයා පවසන්නේ වසර 52 ක් මුළුල්ලේ පවතින යුද ගැටුම්වලින් විපතට පත් වූවන් වෙනුවෙන් නොබෙල් සාම ත්‍යාගයෙන් ලද මුදල පරිත්‍යාග කරන බවයි.



ආගමික උත්සවයකට සහභාගී වූ කොලොම්බියා ජනාධිපතිවරයා මේ බව නිවේදනය කර තිබෙනවා. ඔහුගේ පවුලෙන් මේ සඳහා පුර්ණ අනුමැතිය ලැබුණු බව ද ඔහු ප්‍රකාශ කර සිටියා.

ඔහු ඉකුත් දා මෙම සම්මානයෙන් පිදුම් ලැබුවේ ෆාර්ක් ගරිල්ලන් සමග පවතින ගැටුම් නිම කිරීමට දරණ උත්සහය වෙනුවෙන්. ඊට අදාළව කොලොම්බියානු ජනාධිපතිවරයාට ඩොලර් නවලක්ෂ විසිපන් දහසක ත්‍යාග මුදලක් ද හිමි වුණා.



කොලොම්බියාවේ පවතින ගැටුම්වලින් පුද්ගලයින් දෙලක්ෂ හැට දහසකට අධික පිරිසක් දැනටමත් ජීවිතක්ෂයට පත්ව අවසන්. අවතැන් සංඛ්‍යාව ලක්ෂ 60කට අධිකයි.

ගැටුම් නිම කිරීමේ අරමුණින් ෆාර්ක් ගරිල්ලන් සමග ඉකුත් මාසයේ සාම ගිවිසුමකට ද අත්සන් තැබීමට ජනාධිපතිවරයා පියවර ගත්තා. එහෙත් ඉකුත් සතියේ පැවති ජනමත විචාරණයේ දී කොලොම්බියාවේ ජනතාව එය ප‍්‍රතික්ෂේප කළා.