උත්සව සමය ඉලක්ක කර පාරිභෝගික කටයුතු අධිකාරියෙන් විශේෂ වැඩපිළිවෙළක්

උදා වී ඇති දෙසැම්බර් උත්සව සමයේදී පාරිභෝගිකයන්ට වෙළෙඳපොළ තුළදී සිදුවිය හැකි අසාධාරණකම් වැළැක්වීම සඳහා පාරිභෝගික කටයුතු පිළිබඳ අධිකාරීය විශේෂ වැඩපිළිවෙළක් ක්‍රියාත්මක කර තිබේ.

ඒ අනුව අද (01) දිනයේ සිට ජනවාරි 15 දින දක්වා සිල්ලර වෙළඳසැල් සහ සුපිරි වෙළඳසැල් වැටලීම් ක්‍රියාත්මක කිරීමට නියමිතව ඇත.

එම අධිකාරිය පැවසුවේ උත්සව සමය තුළ පාරිභෝගිකයන් වැඩි වශයෙන් මිලදී ගන්නා ඇඳුම් පැළඳුම්, කල් පවත්නා භාණ්ඩ, විදුලි උපරකණ හා අත්‍යවශ්‍ය භාණ්ඩ අලෙවි කරනු ලබන වෙළඳසැල් වෙත විශේෂ අවධානයක් යොමු කිරීමට නියමිත බවය.

මෙම වැටලීම් සිදු කිරීමේදී භාණ්ඩවල සඳහන් මිලට වෙළඳසැල් තුළ විකිණීම, භාණ්ඩ මිල සඳහන් කර ප්‍රදර්ශනය කර විකිණීම, භාණ්ඩ විකිණීමේදි විධිමත් බිල්පත් නිකුත් කිරීම මගින් විධිමත් වෙළඳාමක් සිදුවන බවට විමසිලිමත් වීම සම්බන්ධව වැඩි අවධානයක් යොමු කිරීමට ද නියමිතව තිබේ.

මීට අමතරව ජංගම වෙළඳුන් සහ සේල් වැනි ක්‍රියාකාරකම් පිළිබඳව ද එම අධිකාරිය විශේෂ අධීක්ෂණයට ලක් කිරීමට නියමිතය. 

මේ අතර කල් ඉකුත් වූ සහ තොරතුරු වෙනස් කරමින් නොයෙකුත් භාණ්ඩ වෙළඳපොළ වෙත පැමිණීමේ ඉඩකට වැඩි බැවින් ඒ පිළිබඳ විශේෂ අවධානයක් යොමුකරමින් පසුගිය දින කිහිපය පුරාව වැටලීම් සිදුකරනු ලැබූ තොග අලෙවිසැල් හා ගබඩා පරීක්ෂා කිරීම් තවදුරටත් අඛණ්ඩව ඉදිරියට සිදු කරමින් පවතින බවද පාරිභෝගික කටයුතු පිළිබඳ අධිකාරිය පැවසීය.

කාර්යාල වේලාවන් හිදී මේ සම්බන්ධව පැමිණිලි ඇත්නම් 1977 දුරකථන අංකය අමතා දැනුම්දිය හැකි අතර අනෙකුත් වේලාවන් හිදි හඬ පණිවිඩයක් (voice message) තැබීමෙන් ද විමර්ශන නිලධාරීන් ඒ පිළිබඳව කටයුතු සිදුකරන බවත් එම අධිකාරිය පැවසීය.

එමෙන්ම ඉදිරියේදී කාර්යාල වේලාවන් නොවන දිනවලදී ද ජනතාවට මේ සම්බන්ධව පැමිණිලි පාරිභෝගික කටයුතු පිළිබඳ අධිකාරියේ නිලධාරීන් වෙත යොමු කිරීම සඳහා අවශ්‍ය කටයුතු සිදුකරමින් පවතින බවද එම අධිකාරිය වැඩිදුරටත් පැවසීය.