එක මෙගා ඩීල් එකක්වත් ඔප්පු කරලා නෑ

මහින්ද රාජපක්ෂ ආණ්ඩුව කාලයේදී සිදුකළ බවට චෝදනා නැඟූ මෙගා ඩීල් කිසිවක් ඔප්පු කර පෙන්වීමට බලයට පත්වී මාස 20ක් ගතවුවද වත්මන් ආණ්ඩුව නොහැකිවී ඇති බව පිවිතුරු හෙළ උරුමයේ නායක පා.ම උදය ගම්මන්පිල මහතා පවසයි.

කොළඹ අද පැවති මාධ්‍ය හමවුකදී ඔහු කියා සිටියේ එම චෝදනා ගැන අඩු තරමින් නඩු පවරා විමර්ශනයක් වත් ආරම්භ කර ඇතිද? යන්නයි.

පාඨලී චම්පික රණවක ඇමතිවරයා එදා කියා සිටියේ අධිවේගී මාර්ගවල වටිනාකමින් සියයට 90ක්ම තියෙන්නේ කොමිස් බවත්, ඉතිරි සියයට 10 පමණක් ඇත්තේ මාර්ගයේ වටිනාකම බවත් යැයි මන්ත්‍රීවරයා පෙන්වාදුන්නේය.

කෙසේ වුවද වත්මන් ආණ්ඩුව කොළඹ - නුවර අධිවේගී මාර්ගය ඊට වඩා වැඩි ගාණකට පරණ සමාගමටම කොන්ත්‍රාත්තුව භාර දී ඇතැයි හෙතෙම කියා සිටියේය.

තවද ඒ කාලයේදී මෙගා ඩීල් කියූ නොරොච්චෝලේ විදුලි බලාගාරය, මත්තල ගුවන්තොටුපළ පිළිබඳ අඩු තරමින් විමර්ශනයක්වත් පවත්වා තිබේද?  යන්නත් මන්ත්‍රීවරයා ප්‍රශ්න කළේය.