අභියෝගයක්...

ජනතා විමුක්ති පෙරමුණ ප්‍රමුඛ ජාතික ජන බලවේගයෙන් එළැඹෙන ජනාධිපතිවරණය සඳහා පාර්ලිමේන්තු මන්ත්‍රී අනුර කුමාර දිසානායක මහතා ඉදිරිපත් වන බව ඊයේ(18) නිල වශයෙන් ප්‍රකාශයට පත් කෙරුණි.

ඒ කොළඹ ගාලු මුවදොර පිටියේ පැවැති "ජාතික ජන බලවේගය" ජන රැළියේදියි.

ජනතා විමුක්ති පෙරමුණ ප්‍රමුඛ තවත් දේශපාලන හා සිවිල් සංවිධාන 28කින් සැදුම්ලත් "ජාතික ජන බලවේගය" සංවිධාන කළ ජන රැළිය අද පස්වරු 3ට කොළඹ ගාලු මුවදොර පිටියේදි ආරම්භ කෙරුණි.

ජන බලවේගයේ පාර්ශ්වවල නියෝජිතයන් වේදිකාවට පැමිණීමෙන් පසු ජන රැළිය ආරම්භ විය.

එහිදී එළඹෙන ජනාධිපතිධුර අපේක්ෂකයා ලෙස නම් කෙරුණේ ජනතා විමුක්ති පෙරමුණේ නායක පාර්ලිමේන්තු මන්ත්‍රි අනුර කුමාර දිසානායක මහතායි.

මෙලෙස ජනතා විමුක්ති පෙරමුණ තම පක්ෂයෙන් ජනාධිපතිධුර අපේක්ෂකයෙකු ඉදිරිපත් කළේ වසර 20 කට පසුවයි.

1999 වසරේදී නන්දන ගුණතිලක මහතා එම පක්ෂයේ ජනාධිපති අපේක්ෂකයා ලෙස ඉදිරිපත් වෙමින් තුන්වන ස්ථානයට වැඩිම මනාප හිමිකර ගත්තේය.

2005 වසරේදී ඔවුන් එවකට අග්‍රාමාත්‍ය මහින්ද රාජපක්ෂ මහතාටත්, 2010 වසරේදී විපක්ෂයේ පොදු අපේක්ෂකයා වූ සරත් ෆොන්සේකා මහතාටත් සහාය පළ කළ අතර 2015 වසරේ පැවති අවසන් ජනාධිපතිවරණයේදී කිසිදු ප්‍රධාන අපේක්ෂකයෙකුට සෘජුව සහාය පළ කිරීමෙන් වැළකී සිටියේය.